ചവിട്ടുപടികള്‍

എപ്പോഴെങ്കിലും ചവിട്ടുപടികളായിട്ടുണ്ടോ?
കയ്യിങ്ങിനെ ഉള്ളിലോട്ട് വളച്ച് പിടിച്ച്
വിരലുകള്‍ നിവര്‍ത്തിവെച്ച്
കാലിങ്ങനെ മുന്നോട്ട് കുത്തിവളഞ്ഞ്
കസേരയില്ലാത്ത ഇരിപ്പില്‍
എത്ര നേരം നിന്നു കൊടുക്കണം എന്നറിയുമോ?

എന്തൊരു നാറ്റമാണ് ചിലരുടെ വിയര്‍പ്പ്
ചിലര്‍ക്കാകട്ടെ എന്തൊരു വണ്ണമാണ്
ചിലപ്പോള്‍ ചവിട്ടി മുന്നോട്ടായുന്നവര്‍
കണ്ണിലാവും വിരലുകള്‍ കുത്തുക
വായിലിട്ടാല്‍ കടിക്കുകയെങ്കിലുമാകാം
മൂക്കിന്റെ തുമ്പില്‍ പിടിച്ച് കയറി
മുടിയിലൂയലാടി പെടഞ്ഞ് മുന്നോട്ടാഞ്ഞ്

എന്നിട്ടും ചിലപ്പോള്‍ മുഴുവന്‍ പടികളും കയറാതെ
ഇടയ്ക്ക് വെച്ച് നെഞ്ചിന്‍ കൂടില്‍ ഉടക്കി നില്‍ക്കുകയാണ് ചിലര്‍!