പ്രിയ ചിദംബരം മന്ത്രി!

പ്രിയ ചിദംബരം മന്ത്രി

കുറച്ച് നാളായി മനുഷ്യന്‍ സഹിക്കുന്നു. ഒരൊറ്റ നാഴിമണി അരി കിട്ടാനില്ല. കിട്ടുന്ന അരിയാകട്ടെ മനുഷ്യനു വായില്‍ വെക്കാന്‍ കൊള്ളാത്ത ബസ്മതിയും പിന്നെ സൌതില്‍ നിന്നോ മറ്റോ വരുന്ന ഏതാണ്ട് ഒരു അരിയും. എത്ര നാള്‍ ഞങ്ങളെയിങ്ങനെ അരിപ്പട്ടിണിക്കിടാനാണ് പദ്ധതി? താങ്കളുടെ മൂക്കിന്റെ താഴെക്കൂടെ ആളുകള്‍ അരി കള്ളക്കടത്തുന്നു. സ്വര്‍ണ്ണം ആര്‍ക്കും വേണ്ട. ഒരല്പം കുത്തരിക്കാണിപ്പോള്‍ ഡിമാന്റ്. നോര്‍ത്ത് ഇന്ത്യയിലോ മറ്റോ ബസ്മതി അരിച്ചാക്കുകള്‍ക്കൊപ്പമാണത്രേ നമ്മുടെ കുത്തരി കടത്തുന്നത്. പൊന്നും വിലക്കാണ് ഇവിടെ എന്നിട്ട് ഒരു പായ്ക്കറ്റ് വില്‍ക്കുന്നത്. എന്നിട്ട് ഇന്ത്യന്‍ കടയില്‍ അരി വന്നു എന്നു അതീവ രഹസ്യമായി എസ്.എം.എസ് മെസേജ് കിട്ടുന്ന വഴി ഓഫീസില്‍ നിന്നു തലതല്ലിയലച്ച് ഓടിച്ചെന്ന് പിള്ളേരേം കുളിപ്പിച്ച് ചെല്ലുമ്പോഴേക്കും അവിടെ ഒരു അരിമണി പോയിട്ട് കൊണ്ടോന്ന ചാക്ക് സഹിതം നല്ല മിടുക്കരു പെമ്പിള്ളേരു‍ കൊണ്ടു പോയിക്കാണും.

ആദ്യം പരിപ്പായിരുന്നു. പക്ഷെ എന്നിട്ടും പരിപ്പിളകാതെ ഞങ്ങള്‍ പിടിച്ചു നിന്നു. അപ്പോഴാണ് അരിക്ക് വിലക്ക്. കുറച്ച് നാള്‍ സഹിച്ചു. ഓണത്തിനു കുത്തരി കൂട്ടാണ്ട് കാളനൊന്നും അങ്ങട് ശരിക്കും കുഴച്ച് കഴിക്കാന്‍ പറ്റിയില്ല. ങ്ങാ പോട്ടെ, എന്നു വെച്ചു. പ്രതിസന്ധിയല്ലേ, നാടല്ലേ മുഖ്യം എന്നൊക്കെ ആശ്വസിച്ചു. എന്നിട്ടിതെത്ര നാളു തുടരാനാണ് പ്ലാന്‍? ഒന്നും മിണ്ടുന്നില്ലാന്ന് വെച്ച്? കാര്യം അമേരിക്കയിലാണ്, ബര്‍ഗറും, പിസ്തായും, പാസ്തായും ഒക്കെ ഉള്ള നാടാണെങ്കിലും ഉള്ളതു പറയാമല്ലോ കുത്തരി ചോറും ഒരല്പം വാസനയ്ക്കായി മീഞ്ചാറും ഇല്ലാണ്ട് ഭക്ഷണം കഴിച്ചതുപോലെ തോന്നില്ല. പച്ചരി കഴിച്ച് മനുഷ്യന്‍ നാശകോശമായി.

പണ്ടെന്തൊരു അഹങ്കാരമായിരുന്നു. റൈസ് ബ്രാന്‍ ഓയില്‍ ഉള്ളോണ്ട് നിറപറ ആരും വാങ്ങിക്കില്ല. ആന്ധ്രയിലെ കളര്‍ വെള്ളം അടിച്ചു വരുന്നതുകൊണ്ട് ലക്ഷ്മിയും വാങ്ങിക്കില്ല. പിന്നെ പവിഴം വേണോ, ഡബിള്‍ ഹോര്‍സ് വേണോ എന്നൊക്കെയായിരുന്നു. ഇപ്പൊ ദേ, ലക്ഷ്മിയെങ്കില്‍ ലക്ഷ്മി മതി, നിറപറയെങ്കില്‍ നിറപറ. എന്തെങ്കിലും കടത്തി വിടൂ. പ്ലീസ്. മനുഷ്യന്‍ ആ കുത്തരി വേവിച്ചിട്ട് അതിന്റെ കഞ്ഞിവെള്ളം ഊറ്റുമ്പോഴുള്ള ആ പാലക്കാടന്‍ മണ്ണിന്റെ വാസന ഒന്നു ശ്വസിച്ചിട്ട് എത്ര നാളായീന്ന് അറിയോ? മര്യാദയ്ക്ക് ചമ്മന്തി അരച്ച് കൂട്ടിക്കൊഴച്ച് കഴിക്കാന്‍ കുത്തരിയല്ലാണ്ട് പിന്നെ വേറെ ഏതെങ്കിലും അരിക്ക് പറ്റുമോ? ഒട്ടും സഹിക്കാന്‍ വയ്യാണ്ട്, ഇന്നാളിരുന്ന പൊടിയരിക്കഞ്ഞിക്കുള്ളത് ഞങ്ങള്‍ പൊടിയരിച്ചോറ് വെച്ച് കഴിച്ചു. ങ്ങാഹാ!

ഒഹ്, എന്തൊക്കെ ബഹളം ആയിരുന്നു. ഇഡ്ഡലിക്ക് വരെ കുത്തരി അരച്ച് അഹങ്കരിച്ചിട്ടുണ്ട്. കുത്തരിയുടെ അവലേ തിന്നൂ, കുത്തരിയുടെ പുട്ടേ ഇറങ്ങൂ, ഇടിയപ്പം വരെ അതു മതി. സായിപ്പൊക്കെ വിരുന്നിനു വരുമ്പൊ ദിസ് റൈസ്, ഡബിള്‍ ബോയില്‍ഡ്, ദ ബ്രാന്‍ സ്റ്റിക്ക്സ് റ്റു ദ റൈസ് ഗ്രെയിന്‍, സൊ വെരി ഗുഡ് ഗുഡ്, ഫുള്‍ ഓഫ് ഫൈബര്‍ എന്ന് ആംഗ്യഭാഷ്യയിലും അറിയാവുന്ന ഇംഗ്ലീഷിലും വെച്ചു കാച്ചുമ്പോള്‍ എന്തൊരു ഗമയായിരുന്നു. ഇന്നാളൊരു അമേരിക്കക്കാരി എഴുതി ചോദിക്കുന്നു, ഈ ബ്ലോഗിലൊക്കെ കൊട്ടിഘോഷിച്ചോണ്ടിരുന്ന ആ ‘കുറ്റരി’ എവിടെ കിട്ടുമെന്ന്. ദേ അമേരിക്കക്കാരെ വരെ അത് തിന്നാന്‍ പഠിപ്പിച്ചോണ്ടിരിക്കുമ്പോഴാണ് ഇങ്ങിനെയൊരു പാതകം.

ഇവിടെ എത്ര നേരമില്ലെങ്കിലും കാലത്തെ എഴുന്നേറ്റ് ഒരല്പം അരി വെള്ളത്തിലിട്ട് അത് പ്രാതലൊക്കെ ഉണ്ടാക്കിവരുമ്പോഴേക്കും, കുളിച്ച് റെഡിയാവുമ്പോഴേക്കും, ഇങ്ങിനെ തിളച്ച് തിളച്ച് തൂവി, ചോറാക്കി, അതൊന്നു ഇങ്ങിനെ പതുക്കെ പൂ പോലെ കോരിയിട്ട് ഒരിച്ചരെ മോരും എന്തേലും ചുട്ടതോ വറുത്തതോ ഒക്കെ എടുത്ത് ഉച്ചയ്ക്ക് ഓഫീസിലേക്ക് കൊണ്ടു പോവുന്നതാണ്. എന്നിട്ടാണീ ചതി ഞങ്ങളോട്. പച്ചരി ഇങ്ങിനെ തിന്നാനാണെങ്കില്‍ ഞങ്ങളൊക്കെ വല്ലോ നോര്‍ത്ത് ഇന്ത്യയിലും ജനിച്ചാ പോരായിരുന്നോ? ഇതിലും ഭേദം ചപ്പാത്തിയാ. ദേ ഞങ്ങളെക്കൊണ്ട് ചപ്പാത്തി തീറ്റിച്ച് പഞ്ചാബിനു ലാഭം ഇണ്ടാക്കിപ്പിക്കരുത്.

ഈ കഴിഞ്ഞ ക്രിസ്തുമസ്സിനു ഇവിടെ ഞങ്ങളു ചെത്തിയ നല്ല കള്ളു കൊണ്ട് ഉണ്ടാക്കിയ കള്ളപ്പവും, നല്ല കാട്ടു പന്നീടെ വെടിയറിച്ചിയും കഴിക്കുമ്പോ അതിന്റെ കൂടെ കുത്തരിയില്ലാ‍ണ്ട്? പിന്നെ മനുഷ്യന്‍ എന്തുകൂട്ടി കുഴക്കും? നാട്ടിലെ സകല സാധനവും കിട്ടീ‍ലെങ്കില്‍ ഞങ്ങള്‍ ഉണ്ടാക്കിയെടുക്കും. ഇവിടെ അറിയാവുന്ന സകല മലയാളികളും അവനവനു കിട്ടണ സ്ഥലത്ത് നല്ല പനങ്കള്ള് മുതല്‍, കറിവേപ്പില മുതല്‍, കപ്പ മുതല്‍, കാച്ചിലു വരെ ഉണ്ടാക്കി കഴിക്കുന്നു. അരി മാത്രമാണ് ഞങ്ങള്‍ കൃഷി ചെയ്യാത്തത്. ദേ ഒരുപാട് മൂപ്പിച്ചാ ഞങ്ങളതും ചെയ്യും, പറഞ്ഞില്ലാന്ന് വേണ്ട. പിന്നെ അമേരിക്കന്‍ ഡോളറു കിട്ടാണ്ട് അരി കര്‍ഷകര്‍ ഇനി പ്രതിസന്ധിയിലാണെന്ന് പറഞ്ഞേക്കരുത്. നിങ്ങളു കേരളാ മലയാളീസ് അവിടെ അന്ധ്രയില്‍ നിന്നു അരി നോക്കി ഇരിക്കണ പോലെ ഒന്നും ഇരിക്കാനുള്ള ക്ഷമ ഞങ്ങള്‍ക്കില്ല. ഇവിടെ ഏക്കറു കണക്കിനാണ് ഭൂമി തുച്ഛ വിലയ്ക്ക് കിട്ടാ. ഇവിടെ ട്രാക്റ്റര്‍ ഇറക്കാന്‍ ഒരാളേയും പേടിക്കണ്ട. നെല്‍ക്കതിരു കൊയ്യാനും ആരുടേം ഒത്താശ വേണ്ട. വെറുതേ ഇരിക്കുന്ന ഞങ്ങളെ ഇനി ആ പാപവും കൂടി ചെയ്യിപ്പിക്കരുത്!!

- എന്ന് വേദനിക്കുന്ന അമേരിക്കക്കാരി.