വീട് എങ്ങിനെ അലങ്കോലമാക്കാം - I

മുഖവുര
കണ്ടൊ, ആ ടൈട്ടില്‍ അകത്തളം (Interior Decoration) അല്ലെങ്കില്‍ വീട് എങ്ങിനെ മനോഹരമാക്കാം എന്നാണെങ്കില്‍ ചിലപ്പോള്‍ നിങ്ങള്‍ ക്ലിക്കിയെന്നു വരില്ല. അതുപോലെയൊരു ടൈട്ടില്‍ കാണുമ്പോള്‍ അതു ശ്രദ്ധയാകര്‍ഷിക്കുന്നു. :) അതു തന്നെയാണ് ഒരു വീടിനെ മനോഹരമാക്കി ഇടുന്നതിന്റെ പുറകിലെ അടിസ്ഥാന ശാസ്ത്രം. Interior Decoration-നെ ക്കുറിച്ച് കോഴ്സുകളും, അനവധി പുസ്തകങ്ങള്‍ ലൈബ്രറിയിലും, ഇന്റെര്‍നെറ്റില്‍ ലേഖനങ്ങളും ഉണ്ട്. അതു തന്നെ വീണ്ടും ആവര്‍ത്തിച്ച് ബോറടിപ്പിക്കുന്നില്ല. എനിക്കറിയാവുന്ന കാര്യങ്ങള്‍ അധികം ടെക്നിക്കല്‍ അയിപ്പോവാതെ വിശദീകരിക്കാം.

എന്തിനാണ് Interior Decoration? അതാണ് എപ്പോഴും എനിക്കേറ്റവും ഇഷ്ടപ്പെട്ട ചോദ്യം. എല്ലാം വെള്ള പെയിന്റടിച്ച്, അടിച്ചു വാരി വൃത്തിയാക്കിയിട്ടാല്‍, പിന്നെ അതിനെക്കുറിച്ച് ഇതുപോലെ വേവലാതിപ്പെടേണ്ട കാര്യമുണ്ടൊ? ഇതൊക്കെ പൈസക്കാര്‍ക്ക് കാശു കളയാനുള്ള ഒരു പരിപാടിയല്ലെ? അകത്തളം മനോഹരമാക്കുന്നതു ആദ്യമേ ശ്രദ്ധിച്ചാല്‍ ഏറ്റവും ചിലവു കുറഞ്ഞു ചെയ്യാവുന്ന കാര്യമേയുള്ളൂ. എന്തിനു പാലൊഴിച്ച കാപ്പി കുടിക്കുന്നു, കട്ടന്‍ അടിച്ചാല്‍ പോരെ എന്നുള്ള ചോദ്യത്തിന്റെ ഉത്തരമാണ് എന്തിനാണ് അകത്തളം മോടിപിടിപ്പിക്കുന്നു എന്നതിനും. :-)

ഇങ്ങിനെ വിചാരിക്കൂ. ഒരു വീടൊക്കെ നമ്മള്‍ വെച്ചു. ഇനി ഫര്‍ണിച്ചര്‍ വാങ്ങിക്കണം, കര്‍ട്ടന്‍ തയ്യക്കണം, കാര്‍പെറ്റ് വാങ്ങിക്കണം, പെയിന്റടിക്കണം അങ്ങിനെ അങ്ങിനെ. ഫര്‍ണിച്ചര്‍ വാങ്ങിക്കുമ്പോള്‍ ഒരു ചെറിയ ശ്രദ്ധ, കര്‍ട്ടനു തുണി വാങ്ങിക്കുമ്പോള്‍ ഒരു ചെറിയ ശ്രദ്ധ, കാര്‍പെറ്റും പെയിന്റിനും ഒരു ചെറിയ ശ്രദ്ധ. അതു മതി, വീട് മനോഹരമാകുവാന്‍. വീടിന്റെ അകത്തളം നിങ്ങളുടെ പേര്‍സണാലിറ്റിയെ സൂചിപ്പിക്കണം എന്നു വിശ്വസിക്കുന്നവളാണ് ഞാന്‍. (അതുകൊണ്ടാണല്ലൊ ബാച്ചിലേര്‍സ് റൂമില്‍ പോകുവാന്‍ പെണ്‍കുട്ടികള്‍ ഭയക്കുന്നതു) :)

എന്നു വെച്ചാല്‍, ഫര്‍ണിച്ചര്‍ പച്ച നിറത്തിലുള്ളതാണെങ്കില്‍, അതിനു ചേരുന്ന നിറങ്ങളായ കര്‍ട്ടനോ, കാര്‍പെറ്റോ വാങ്ങിക്കുവാണെങ്കില്‍ നിങ്ങള്‍ കര്‍ട്ടനു മുടക്കുന്ന അതേ വിലക്ക് ഗുണം രണ്ടിരട്ടിയാവില്ലെ? മോടി പിടിപ്പിക്കുന്നതിനു പ്രത്യേകിച്ചു പണചെലവ് അവിടെ വേണ്ടല്ലൊ. അതു തന്നെ കാര്‍പെറ്റിലും ഒക്കെ ശ്രദ്ധിച്ചാല്‍ മനോഹരമായ ഒരു അന്തരീക്ഷം സൃഷ്ടിക്കാം.

പലര്‍ക്കും പറ്റുന്നത്, ഒരു വീട് വാങ്ങിച്ചു കഴിഞ്ഞാല്‍ പിന്നെ അതില്‍ സാധനങ്ങള്‍ കുത്തി നിറക്കാനുള്ള തത്രപ്പാടാണ്. എന്ത് എങ്ങിനെ ചേരുന്നു, ഏത് നിറം എന്നൊന്നുമില്ല. കുറേയധികം സാധങ്ങള്‍ വാങ്ങിച്ചു കൂട്ടുക. എന്നിട്ട് പിന്നെ വീട്ടില്‍ വന്നിരുന്ന്, അതിനെയൊക്കെ എവിടെ ഫിറ്റ് ചെയ്തു വെക്കാം എന്ന് ആലോചിക്കുക. അങ്ങിനെയല്ല അതു ഒരിക്കലും ചെയ്യേണ്ടത്. അതു ആ വീടിനെ ശ്വാസം മുട്ടിച്ചു കൊല്ലുകയാണ്.

വീടു വെച്ചു. പിന്നീട് അതിനെ കുറച്ചു നാള്‍ ശ്വസിക്കാന്‍ വെറുതെ വിടുക. പതുക്കെ പതുക്കെ ഒരു ഒന്നോ രണ്ടോ മാസം കൊണ്ട് ആ വീടിനു ഒരു പേര്‍സണാലിറ്റി കൈവരും. എന്തൊക്കെ എവിടെയൊക്കെ വേണമെന്ന് ഒരു രൂപം കിട്ടും. എന്തൊക്കെ വേണ്ടാന്നും. ഒരു ഐഡിയ മനസ്സില്‍ വന്നാല്‍, പിന്നെ അതിനെക്കുറിച്ച് വളരെയധികം ആലോചിക്കുക. ഒരു മാസം എങ്കിലും അതേ ഐഡിയ നിങ്ങളുടെ മനസ്സില്‍ ഉണ്ടെങ്കിലേ അത് വീട്ടില്‍ വേണമെന്ന് കടലാസില്‍ അടയാളപ്പെടുത്താവൂ. അതാണ് ആദ്യം ചെയ്യേണ്ടത്. ഇങ്ങിനെ ചെയ്യുമ്പോള്‍ കാശു പാഴായിപോകില്ല, മാത്രവുമല്ല മനോഹരമായ ഒരു അകത്തളം നമുക്കുണ്ടാവുകയും ചെയ്യും.

എന്റെ റെക്കമെന്റേഷന്‍ അഅളുകള്‍ക്ക് കൊടുക്കുന്നത്. മിനിമം ആറു മാസമെങ്കിലും താമസിച്ചതിനു ശേഷമെ ഇന്റീരിയറിനെക്കുറിച്ച് ആലോചിക്കാവൂ എന്നാണ്. അത്രയും നാളുകള്‍ തിരക്കു പിടിച്ച തീരുമാനങ്ങളില്‍ നിന്നും അബദ്ധങ്ങളില്‍ നിന്നും ഒക്കെ നമ്മളെ രക്ഷിക്കും.

വീട്ടില്‍ പല മുറികള്‍ ഉണ്ടെന്ന് ഇരിക്കട്ടെ. ഒരോ മുറിക്കും ഒരോ ഉപയോഗങ്ങളാണ്. ഒരോ വ്യക്തിത്വമാണ്. അതുകൊണ്ട് തന്നെ ഒരൊ മുറിക്കും പ്രത്യേകം പ്രത്യേകം പദ്ധതികള്‍ വേണം. കുട്ടികളുടെ മുറിയില്‍ കടും നിറങ്ങളാണ് നല്ലതെങ്കില്‍, പ്രായം ചെന്നവരുടെ മുറിക്ക് ചിലപ്പോള്‍ ഇളം നിറങ്ങളായിരിക്കും ചേരുക. അതുകൊണ്ട് തന്നെ, ഒരു വീടിനു മൊത്തം ഒരേ തരം കര്‍ട്ടണൊ, ഒരേ തരം കാര്‍പെറ്റോ വാങ്ങിക്കരുത്. ഞാന്‍ കണ്ടിട്ടുണ്ട്, പൂമുഖം മുതല്‍ അടുക്കളയുടെ വാതില്‍ വരെ ഒരേ നിറത്തിലുള്ള കര്‍ട്ടനുകള്‍. എനിക്കത് ഒരു ആശുപത്രിയോ സ്കൂളോ ഓര്‍മ്മിപ്പിക്കുന്നു. അതുകൊണ്ട് റേഷന്‍ കടയില്‍ നിന്ന് കിട്ടിയ പോലെ എല്ലാ മുറിയിലും ഒരേ സാധങ്ങള്‍ കൊണ്ട് നിറക്കരുത്.

ഓരോ മുറിക്കും ഒരു പ്രത്യേകത ഉണ്ടാവും. ആളുകളില്‍ നമ്മള്‍ കണ്ണുകള്‍ അദ്യം ശ്രദ്ധിക്കില്ലേ? അതുപൊലെയാണ് മുറികള്‍ക്കും. ഒരു പ്രത്യേകത. അതിപ്പൊ ഒരു തൂണാവും, ഒരു ജനല്‍ ആവും, ഒരു പ്രത്യേക ഷേപ്പ് ആവും, കൊത്തുപണികള്‍ ആവും. എന്തു അലങ്കാരം ചെയ്യുമ്പോഴും ഈ പ്രത്യേകത ഉയര്‍ത്തിക്കാട്ടുകയാണ് എപ്പോഴും ചെയ്യേണ്ടത്. എന്നു വെച്ചാ‍ല്‍ വായും വെളിച്ചവും ഉള്ള ഒരു വലിയ ജനല്‍ ഒരു മുറിയിലുണ്ടെങ്കില്‍, അത് കട്ടിയുള്ള കര്‍ട്ടന്‍ കൊണ്ട് മൂടുകയോ ആ ജനലിലേക്ക് പോകാന്‍ കഴിയാത്ത വിധം ഫര്‍ണിച്ചര്‍ കൊണ്ട് നിറക്കുകയോ ചെയ്യരുത്. ആ ജനലിനെ മുറിയുടെ പ്രധാന ആകര്‍ഷഘടകമാക്കി വെച്ച് വേണം മുറി അലങ്കരിക്കാന്‍.

ഒരോ മുറിക്കും ഒരു തീം ഉള്ളത് വളരെ നല്ലതാണ്. ഈ തീം വെച്ച് നമുക്ക് പലതും എളുപ്പത്തില്‍ തീരുമാനിക്കാം. ഒരു ഉദാഹരണത്തിനു: ലിവിംഗ് റൂമില്‍, പൂക്കളുടെ തീം എന്ന് വിചാരിക്കുക. അതുകൊണ്ട് പൂവിന്റെ പാറ്റേര്‍ണ്‍ ഉള്ള കാര്‍പെറ്റുകള്‍, തുണികള്‍, കര്‍ട്ടനുകള്‍ ഇങ്ങിനെ വാങ്ങിക്കാം. അല്ലെങ്കില്‍ നോട്ടിക്കല്‍(nautical) തീം ആണ് നിങ്ങള്‍ക്കിഷ്ടമുള്ളതെന്നിരിക്കട്ടെ. അതാവുമ്പോള്‍ ഷിപ്പിന്റെ പ്രിന്റുകള്‍, ചെറിയ ഷിപ്പിന്റെ മോഡലുകള്‍ അങ്ങിനെ. ഇതു കൊണ്ട് തന്നെ ആ മുറിക്ക് ഒരു പ്രത്യേകത കൈവരുന്നു. പക്ഷെ, ശ്രദ്ധിക്കേണ്ടത് ഇതാണ്. ഒരു തീം തിരഞ്ഞെടുക്കുമ്പോള്‍, അതിപ്പോള്‍ വിക്ടോറിയന്‍ തീം ആണെങ്കില്‍ അതില്‍ contemporary കൊണ്ട് മിക്സ് ചെയ്യരുത്. ഒരു തീമില്‍ തന്നെ ശ്രദ്ധിക്കുക.

ഇനി ശ്രദ്ധിക്കേണ്ട പ്രത്യേകം പ്രത്യേകം കാര്യങ്ങളിലേക്ക് കടക്കാം.

-1-

മറ്റെന്തിനേക്കാളും ആദ്യം നമ്മള്‍ ശ്രദ്ധിക്കുന്നതു ഫര്‍ണിച്ചര്‍ വാങ്ങുവാനാണല്ലൊ. മനസ്സിലും പിന്നീട് ഒരു കടലാസിലും ആദ്യമേ ഒരു പ്ലാന്‍ തയ്യാറാക്കുക. ഒരു മുറിയുടെ 60% കൂടുതല്‍ ഒരിക്കലും ഫര്‍ണിച്ചര്‍ വാങ്ങരുത്. ശ്വാസം മുട്ടുന്ന മുറികളെ കാണുമ്പോള്‍ എനിക്ക് വളരെയധികം വിഷമം വരാറുണ്ട്. ഇന്നലെ ഒരു കൂട്ടുകാരിയുടെ വീട്ടില്‍ പോയതിന്റെ ആഫട്ടര്‍ ഇഫക്റ്റാണ് ഇങ്ങിനെ ഒരു കുറിപ്പെഴുതാന്‍ പ്രചോദനം. എല്ലാ മുറികളിലും നിറയേ ഫര്‍ണിച്ചര്‍, അങ്ങോട്ടോ ഇങ്ങോട്ട് പോകണമെങ്കില്‍ ഒരു മൂന്ന് വട്ടം പലതും പ്രദക്ഷിണം വെക്കണം. ഫര്‍ണിച്ചറുകള്‍ കൊണ്ട് ആഡംബരമല്ല പ്രധാനം, അതിന്റെ ഉപയോഗമാണ്. അതാണ് ആദ്യം മനസ്സിലാക്കേണ്ടത്.

ഫര്‍ണിച്ചര്‍ വാങ്ങിക്കുമ്പോള്‍ അത് ഉപയോഗിക്കാനുള്ളതായിരിക്കണം. പ്രത്യേകിച്ചും കുട്ടികള്‍ ഉള്ള വീടുകളില്‍. ഞാന്‍ കണ്ടിട്ടുണ്ട്, ആളുകള്‍ പുതുപുത്തന്‍ ഫര്‍ണിച്ചര്‍ വാങ്ങിച്ച്, കുട്ടികളെ അതു തൊടാന്‍ സമ്മതിക്കില്ല, അങ്ങോട്ടും ഇങ്ങോട്ടും പോകാന്‍ കൂടി സമ്മതിക്കില്ല. അതുകൊണ്ടെന്തു കാര്യം? വല്ലപ്പോഴും വരുന്ന അഥിതികള്‍ക്കായല്ല മറിച്ച് നമ്മള്‍ക്ക് വേണ്ടിയാണ് നമ്മള്‍ വീട് മോടിപിടിപ്പിക്കേണ്ടത്. കേരളത്തിലെ വീടുകളുടെ ഒരു പ്രത്യേകതയാണ്, എത്ര സാധാരണക്കാരന്റേതാണെങ്കിലും ഒരു അഥിതി മുറി. എന്നിട്ട് എപ്പോഴോ വരുന്ന അഥിതിക്ക് വേണ്ടി അതു വൃത്തിയാക്കി സൂക്ഷിക്കുകയും മോടി പിടിപ്പിക്കുകയും, വീട്ടിലുള്ളവര്‍ എല്ലാം തിങ്ങി താമസിക്കുകയും ചെയ്യും.

ഫര്‍ണിച്ചര്‍ മെറ്റീരിയത്സ് -

തുണി - തുണി ഊരി കഴുകാവുന്നതാണെങ്കില്‍ ഇതു വളരെ നന്നായിരിക്കും. പക്ഷെ അതിനു നല്ലയിനം തുണികള്‍ ഉള്ള ഫര്‍ണിച്ചര്‍ തന്നെ വാങ്ങിക്കണം. അല്ലെങ്കില്‍ ഒരു കഴുകലോട് കൂടി അതിന്റെ ഷേപ്പ് നഷ്ടപ്പെടുകയും, നിറം മങ്ങുകയും ചെയ്യും. ഇതിന്റെ ഗുണം ഇത് എത്ര നിറമുള്ളതും എത്ര പാറ്റേര്‍ണ്‍സ് ഉള്ളതും ലഭ്യമാണെന്നുള്ളതാണ്. വില പല റേഞ്ചില്‍ ഉണ്ട് താനും. മുഴുവന്‍ തുണി കൊണ്ടുള്ളതോ, അല്ലെങ്കില്‍ തടിയിലോ, മുളയിലോ, ഗ്രാസ്സിലോ, മെറ്റലോ, തുണിയുടെ കുഷ്യന്‍ വെച്ചവയോ എല്ലാം ലഭ്യമാണ്. ഒരുപാട് റേഞ്ചുകള്‍ ഉള്ളതാണ് തുണിയുടെ പ്രത്യേകത.

തുകല്‍ (Leather) - ഇത് എല്ലാവര്‍ക്കും ഉപയോഗിക്കാവുന്ന ഒരു മെറ്റീരിയല്‍ ആണ്. കാലാകാലങ്ങളോളം കിടന്നോളും. വെള്ളം, ജ്യൂസിവ വീണാലും, ഒരു തുണി കൊണ്ട് തുടച്ചാല്‍ മതിയാവും. പക്ഷെ ഇതിനു നല്ല വിലയുണ്ട്. നല്ല ഇനം തുകല്‍ ഫര്‍ണിച്ചറിനു അസാമാന്യ വിലയാണ്. മാത്രമല്ല, വാങ്ങിക്കുമ്പോള്‍ ഇത് നന്നായി നോക്കി തന്നെ എടുക്കണം. അല്ലെങ്കില്‍ കാര്യമായി തന്നെ കബളിപ്പിക്കപ്പെടാം. മാത്രവുമല്ല, നല്ല നിറങ്ങള്‍ക്ക് നല്ല വില തന്നെ കൊടുക്കണം. അധികം ചോയ്സുകള്‍ ഇല്ല താനും. പക്ഷെ ഇതിന്റെ പ്രൌഡി ഒന്ന് വേറെ തന്നെയാണ്.

റെക്സിന്‍ (Mock Leather) - ഇതാണ് കുട്ടികള്‍ ഉള്ള ഒരു വീട്ടില്‍, അവരൊന്നു വലുതാവുന്ന വരെ പ്രധാനമായും ഞാന്‍ ആളുകള്‍ക്ക് റെക്കമെന്റ് ചെയ്യാറുള്ള മെറ്റീരിയല്‍. ഏറ്റവും വില കുറഞ്ഞതും ആണിത്. ഒരു പാട് കാലം കിടക്കുകയും ചെയ്യും. തുകല്‍ ആണെന്ന് ഒറ്റ നോട്ടത്തില്‍ തോന്നിപ്പിക്കുകയും ചെയ്യും. അറിയാവുന്നവര്‍ക്കെ പലപ്പോഴും മനസ്സിലാകാറുള്ളൂ. ഉപയോഗിക്കാന്‍ ഏറ്റവും നല്ലതാണിത്.

ഫര്‍ണിച്ചറിന്റെ ഷേപ്പ് തിരഞ്ഞെടുക്കുന്നതിലും ഉണ്ട് അനവധി കാര്യങ്ങള്‍. ഒരു ചെറിയ മുറിയില്‍, തടിച്ച പൊന്തന്‍ ഫര്‍ണിച്ചറുകളേക്കാളും ലൈറ്റ് ഫ്രേമുള്ള ഫര്‍ണിച്ചറുകളാണ് നല്ലത്. കടും നിറങ്ങളുള്ള ഫര്‍ണിച്ചറുകളും അരുത്. അത് മുറിയെ ഇടുങ്ങിയതാക്കി കാണിക്കും. തുണിയോ റെക്സിനോ ഇടുങ്ങിയ മുറികളില്‍ മതിയാവും. തുണിയാണ് അഭികാമ്യം. കാരണം അതു മുറിക്കൊരു calm and cool appearance കൊടുക്കുന്നു.

ഫര്‍ണിച്ചര്‍ വാങ്ങുമ്പോള്‍ അത് സെറ്റ് ആയിട്ട് വാങ്ങിക്കണം എന്നൊരു നിര്‍ബന്ധം ഉള്ള പൊലെ തോന്നിയിട്ടുണ്ട് പലര്‍ക്കും. അതിന്റെ ആവശ്യമില്ല. മാത്രമല്ല, മൂന്ന് പേര്‍ക്ക് ഇരിക്കാവുന്ന ഒരു വലിയ സോഫയേക്കാളും നല്ലത്, രണ്ട് പേര്‍ക്ക് ഇരിക്കാവുന്ന ഒരു ലവ് സീറ്റാണ്. കാരണം, മിക്കപ്പോഴും സോഫയുടെ നടുക്ക് ഇടുങ്ങി ഇരിക്കാന്‍ പലര്‍ക്കും മടിയാണ്.

മുറിയുടെ വ്യാപ്തി അനുസരിച്ചു ഒരു ലിവിങ്ങ് മുറിയില്‍ - ഒരു ലവ് സീറ്റ്, അതിനു അഭിമുഖമായി ഒരു കസേര, സൈഡില്‍ ഒരു കസേര എന്നിവ മതിയാവും. മുറിക്ക് അല്‍പ്പം കൂടി നീളവും വീതിയും ഉണ്ടെങ്കില്‍ ഒരു സോഫാ, രണ്ട് കസേര അപ്പറവും ഇപ്പറവും മതിയാവും.അല്ലാതെ, സോഫാ വാങ്ങിയാല്‍ അതിനൊരു ലവ് സീറ്റും പിന്നെ സിംഗിള്‍ ചെയറും ഒക്കെ വാങ്ങി നിറക്കണമെന്ന് അഖിലിത നിയമമൊന്നുമില്ല. ഒരു പാട് അഥിതികള്‍ വരുമ്പോള്‍ എന്തായാലും മടക്കി വെക്കാവുന്ന കസേരകളോ, അല്ലെങ്കില്‍ ഫൈബര്‍ ഗ്ലാസ്സിന്റെ സ്റ്റാക്കബിള്‍ കസേരയോ ഉപയോഗിക്കാമല്ലൊ. ഫര്‍ണിച്ചര്‍ ഇടുമ്പോള്‍ ഇരിക്കുന്ന ആളുകളുടെ കാലൊ കൈയോ തട്ടാതെ മറ്റൊരു ആള്‍ക്ക് എഴുന്നേല്‍ക്കാനും പോകാനും വരുവാനും സാധിക്കണം. (മുറിയിലെ ഷെല്ഫുകളെ കുറിച്ചും, ടേമ്പിളിനെ കുറിച്ചും പിന്നീട്)

സോഫയും കസേരകളും എല്ലാം ഒരേ നിറമാവുകയും വേണ്ട. മിക്സ് ആന്റ് മാച്ച് കോമ്പിനേഷന്‍ ആണ് എപ്പോഴും ആകര്‍ഷകം. നിറങ്ങളെക്കുറിച്ച് പിന്നീട്...(തുടരും)