അമ്മയ്ക്കറിയാത്തത്

വാഴക്കൂമ്പിനുള്ളിലെ തേനൂറും പൂവുകള്‍ പോലുള്ള ചുവന്ന കുഞ്ഞിക്കൈകള്‍ പതിയേ സാരിത്തുമ്പില്‍ നിന്ന് വിടുവിച്ച്, ഉറങ്ങിക്കിടുക്കുന്ന കുഞ്ഞിനെ തുടരേ തുടരേ ഉമ്മ വെച്ച് ഉമ്മ വെച്ച് അമ്മയൊന്ന് അടര്‍ന്ന് മാറാന്‍ ‍ശ്രമിക്കുമ്പോഴാണ്, കുഞ്ഞിളം കൈകള്‍ കൊണ്ട് ഉറക്കത്തിലും അമ്മയുടെ വിരലുകളില്‍ കുഞ്ഞ് വരിഞ്ഞ് മുറുക്കുന്നത്. അതില്‍ ഞെരുങ്ങിയമരുന്നതാകട്ടേ അമ്മയുടെ ഹൃദയവും. എങ്കിലും മെതുവേ ചെറു മുത്തം കൊണ്ട് കുഞ്ഞിനെ മൂടി വിരലുകളോരോന്നായി മുല്ലമൊട്ടുകള്‍ വിടര്‍ത്തുമ്പോലെ വിടുവിക്കാന്‍ ശ്രമിക്കുമ്പോഴാണ്, കുഞ്ഞ് ഉറക്കത്തില്‍ ചെറുതായൊന്ന് ഏങ്ങുന്നത്. അത് കാണുന്നതും പിന്നേയും കുഞ്ഞിനെ കോരിയെടുത്ത് വാരിപ്പുണര്‍ന്ന് മാറോടണയ്ക്കുവാന്‍ അമ്മയ്ക്ക് പിന്നീടൊരു നിമിഷം പോലും വേണ്ട. പൂമ്പാറ്റച്ചിറക് പോലെ മൃദുവായ കുഞ്ഞിന്‍ ഉടല്‍ അമ്മ തോളില്‍ ചേര്‍ത്തുവെച്ച് മെല്ലെ തട്ടി തീരെ ചെറിയൊരു താരാട്ട് പാട്ട് മൂളി ശ്വാസത്തിന്റെ ദോലന നിരക്കില്‍ ചെറുതായി കുലുങ്ങിക്കൊണ്ട് കുഞ്ഞിനെ പതിയേ ഉറക്കുവാന്‍ ശ്രമിക്കുമ്പോഴാവും അമ്മയുടെ തലമുടിനാരിഴിയില്‍ കൂടി കൈകള്‍ ബന്ധനത്തിലാക്കുവാന്‍ കുഞ്ഞ് ഉറക്കത്തിലും ശ്രമിക്കുന്നത്. കുഞ്ഞിനെ ഉണര്‍ത്താതിരിക്കുവാന്‍ അമ്മ മുടിവലിയുന്ന വേദന അറിയുന്നതേയുണ്ടാവില്ല. പിന്നേയും ഉറങ്ങിയെന്നുറപ്പുവരുത്തി അടര്‍ത്തിമാറ്റാന്‍ ശ്രമിക്കുമ്പോഴാവും അമ്മയെ ഇളംചൂടില്‍ കുഞ്ഞ് പുണ്യാഹം തളിക്കുന്നത്. ആ നനവില്‍ ഞെട്ടിയുണര്‍ന്ന് വാവിട്ട് കരയുന്ന കുഞ്ഞിനെ ചെറുചിരിയോടെ അമ്മ മുലയൂട്ടുന്നതും അപ്പോഴാണ്. മുല കുടിക്കുന്ന കുഞ്ഞിന്റെ വസ്ത്രങ്ങള്‍ മെല്ലെ മാറ്റി പൊന്നിളം മേനി തുടച്ച് നനഞ്ഞ വസ്ത്രങ്ങളോടെ അമ്മ കുഞ്ഞിനെ നോക്കിയിരിക്കുമ്പോഴാവണം വായില്‍ നിന്ന് കവിളിലേക്ക് മുലപ്പാലിറ്റി ചെറുതായി അല്ലിമൊട്ടുകള്‍ പിളര്‍ത്തി കുഞ്ഞ് ഉറങ്ങിവീഴുന്നത്. സാരിത്തുമ്പ് കൊണ്ട് ചുണ്ടുകള്‍ തുടച്ച് നറുമുത്തം കൊണ്ട് കണ്ണുകള്‍ നിറച്ച് പതിയേ കിടത്തുവാന്‍ തുനിയുമ്പോഴാണ് അമ്മ താങ്ങിക്കിടത്തിയിരിക്കുന്ന കയ്യിലോട്ട് ഉറക്കത്തിലെന്ന പോലേ കുസൃതിയോടെ കുഞ്ഞ് ചെരിഞ്ഞ് വീഴുന്നത്. പിന്നീടാ കൈകള്‍ വിടുവിക്കാന്‍ സാധ്യമാവാതെ അമ്മ കുഞ്ഞിന്റെ തൂവല്‍ മേനിയില്‍ മുഖം ചേര്‍ത്ത് കിടന്നുറങ്ങുകയാണ് പതിവ്.

അമ്മയില്‍ നിന്നും അടരാന്‍ ഇഷ്ടമല്ലായെന്ന് അമ്മയ്ക്കെന്താണമ്മേ അറിയാത്തത്?