പാഠപുസ്തകം - പാഠം ഒന്ന് - ‘ഗുണ്ടായിസം’

എനിക്കൊന്നും മനസ്സിലാവുന്നില്ല. ടിവി തുറക്കുമ്പൊ തുറക്കുമ്പൊ മൊത്തം കൊറച്ച് റൌഡികള്‍ ബാങ്ക് തല്ലിപ്പൊട്ടിക്കുന്നു. ബാങ്കും പാഠപുസ്തകവും തമ്മില്‍ എന്തു ബന്ധം? അതോ ഇനി സ്കൂ‍ളൊക്കെ ബാങ്കിലേക്ക് മാറ്റിയോ?

ഞാന്‍ ഏഴാം ക്ലാസ്സിലെ വിവാദ പാഠപുസ്തകം കണ്ടില്ല. എങ്കിലും മിശ്രവിവാഹിതരായ ഒരപ്പന്റേം അമ്മയുടേയും മകനെ സ്കൂളില്‍ ചേര്‍ക്കുന്ന ഒരു പാഠം ഉണ്ടെന്നും അതില്‍ മകന്റെ പേരു ജീവന്‍ ആണെന്നും അതില്‍ "പ്രവേശനസമയത്ത്‌ കുട്ടിയുടെ ജാതിയും മതവും രേഖപ്പെടുത്തുന്നത്‌ നിര്‍ബന്ധമില്ല" എന്നും ഉണ്ടെന്നും എവിടെന്നൊക്കയോ വായിക്കുകയും കാണുകയും ചെയ്തു. ആ ഒരു പാഠത്തില്‍ എന്തണ് ഇത്ര പ്രശ്നം? ഞാന്‍ തലയും കുത്തി നിന്ന് വായിച്ചിട്ടും അതില്‍ ജാതി വേണ്ട, മതം വേണ്ട എന്നൊന്നും പറയുന്നില്ല. അല്ലെങ്കില്‍ ആ പ്രത്യേക പാഠം ഒരു നിരീശ്വരവാദിയെ ഉണ്ടാക്കുമെന്നും.

മിശ്രവിവാഹിതരുടെ മക്കള്‍ക്ക് സ്കൂള്‍ അഡ്മിഷന്‍ അവരെ കുഴക്കുന്ന ഒരു പ്രശ്നമാണെന്ന് പറഞ്ഞും വായിച്ചും കേട്ടിട്ടുണ്ട്. ജാതിയുടെ പേരില്ലല്ലെങ്കിലും സ്കൂള്‍ ഫോമിലെ ചില പ്രത്യേക കോളങ്ങളുടെ രാഷ്ട്രീയം ഒരു കുട്ടിയുടെ അമ്മയ്ക്ക് ഇതുപോലെ ഒരു ദുരനുഭവം ഉണ്ടാക്കിയിട്ടുണ്ട്. അതിന്റെ ലിങ്ക്. എനിക്കതുപോലയേ ഇതും തോന്നുന്നുള്ളൂ.

അങ്ങിനെയെങ്കില്‍ ശ്രീനാരായണ ഗുരുവിന്റെ ഒരു ജാതി ഒരു മതം എന്നത് എങ്ങിനെ സ്കൂ‍ളുകളില്‍ പഠിപ്പിക്കും? അതും ഇതുപോലെ തലതിരിച്ച് എടുത്തൂടേ? ഇതില്‍ എവിടെയാണ് ഈ തല്ലിപ്പൊട്ടിക്കുന്നവര്‍ മതവിശ്വാസത്തിനെതിര് കണ്ടത്? നിങ്ങളൊക്കെ വായിക്കുന്ന കണ്ണാടിയേതാണ്? കിട്ടിയാല്‍ ഉപകാരം, കുറച്ച് ബ്ലോഗുകള്‍ വായിക്കണമായിരുന്നു ;)

ഞാന്‍ ഒരു മതവിശ്വാസിയാണ്. എനിക്ക് എന്നിട്ടു ഈ കുരുട്ട് ബുദ്ധിയുടെ പ്രായത്തില്‍ തലേം കുത്തി നിന്ന് വായിച്ചിട്ട് പോലും അത് ജാതി വേണ്ട മതം വേണ്ട എന്ന് ഒരു ചെറിയ ഈര്‍ക്കിലി തുമ്പോണ്ട് പോലും സൂചിപ്പിക്കുന്നതായിട്ട് തോന്നുന്നില്ല. പിന്നെയങ്ങിനെയാണ് എട്ടും പൊട്ടും തിരിയാത്ത ഏഴാം ക്ലാസ്സിലെ പിള്ളേര്‍ അത് വായിച്ചെടുക്കുന്നത്?

പാഠപുസ്തകത്തിലെ ബാക്കി കാര്യങ്ങള്‍ ഒന്നും അറിഞ്ഞൂട. കമ്മ്യൂണിസ്റ്റുകാര്‍ അങ്ങിനെ കണ്ണടച്ച് രണ്ട് വശവും എഴുതിപിടിപ്പിക്കും എന്നൊക്കെ എനിക്ക് വലിയ വിശ്വാസവുമില്ല. തവളപ്പടവും പുസ്തകത്തിന്റെ പുറം ചട്ടയിലെ മുഷ്ടി പടവുമൊക്കെ അറിയാതെ പറ്റിയതാണെന്നും ഉറപ്പ് പോരാ. ഇത്രയും അവരോട് അവിശ്വാസി ആയിട്ടും ആ മുകളില്‍ പറഞ്ഞിരിക്കുന്ന സംഭവത്തില്‍ എനിക്ക് ഒന്നും തോന്നിയില്ല്ല. അതില്‍ എന്താണിരിക്കുന്നതെന്ന് ബഹുമാനപ്പെട്ട മെത്രാനച്ചന്‍ എനിക്കൊന്ന് അടുത്ത പള്ളിക്കമ്മറ്റിയിലോ ഇടവക യോഗത്തിലോ ഒന്ന് വിശദീകരിച്ച് തന്നാല്‍ നന്നായിരുന്നു.

പാഠപുസ്തക പരിഷ്ക്കരണം എന്നും പറഞ്ഞ് ക്ലാസ്സ് മുറിയില്‍ റൌഡിസം കാണിക്കുവരുടെയൊക്കെ കോമണ്‍ സെന്‍സ് കപ്പ പുഴുങ്ങുന്നതിന്റെ കൂടെയിട്ടോ? ഇവരെയൊക്കെ എന്തു ചെയ്യണം എന്ന് എനിക്ക് മനസ്സിലാവുന്നുമില്ല. ആ പുസ്തകത്തില്‍ പ്രസ്തുത പാഠം കണ്ട് പിള്ളേര് പള്ളീല്‍ പോക്ക് നിറുത്തൂല, പക്ഷെ ഇവരുടെ ഗുണ്ടായിസം കാണുന്ന പിള്ളേര് ചിലപ്പൊ തലതിരിഞ്ഞെങ്കിലായി.