മതമില്ലാത്ത നിയമം

കോടതി: സ്ത്രീയുടെ പേര്?

ഉ: ഷാ ബാനോ

കോടതി: വേറെ പേരുകൾ?

ഉ: ജോർഡൻ ദീങ്ങ്ദിശ് (Jorden Diengdish), ലേഖ വിജയൻ

കോടതി: എന്താണ് പരാതി?

ഉ: ഭർത്താവിന്റെ പീഢനം

കോടതി: ക്ഷമിക്കൂ, ആദ്യത്തെ രണ്ട് പേരുകാർ പീഢനം തുടർന്നും സഹിച്ചേ പറ്റൂ‍. ലേഖ വിജയനു നിയമപരമായി ബന്ധം വിച്ഛേദിക്കാനുള്ള സാധ്യതകളുണ്ട്.

ആണവകരാറിനെക്കുറിച്ച് ഒരു യമണ്ടൻ പോസ്റ്റ് എഴുതാമെന്ന് കരുതി ഇരുന്നപ്പോഴാണ് നാട്ടിൽ നിന്നു പുന്നാര അനിയൻ കൊടുത്തയച്ച ടിവി ചന്ദ്രന്റെ 'പാഠം ഒന്ന് - ഒരു വിലാപം' കാണാമെന്ന് ഓർത്തത്. ചങ്ക് പറിഞ്ഞ് പോയി. നിരനിരയായി ഒക്കത്തൊരു കുട്ടിയുമായി നടന്ന് വരുന്ന പതിനഞ്ച് വയസ്സുകാരികൾ.

ഇന്ത്യൻ പാർലിമെന്റിന്റെ ചരിത്രത്തിൽ ഏറ്റവും കൂടുതൽ ഭൂരിപക്ഷം ഉണ്ടായിരുന്ന രാജീവ് ഗാന്ധി സർക്കാർ ഷാ ബാനോ‍ കേസിൽ കാണിച്ച തെമ്മാടിത്തരമാണ് ഓർമ്മ വന്നത്. ഇന്ത്യയിൽ ഒരു വത്തിക്കാനും സൗദിഅറേബ്യയും ഉണ്ടാക്കുന്നുതാണോ ഇന്ത്യയെ പുതുയുഗത്തിലേക്ക് നയിക്കുമെന്ന് പ്രത്യാശിച്ച ഒരു യുവപ്രധാനമന്ത്രി ചേയ്യേണ്ടിയിരുന്നത്?

എന്ത് ആണവ കരാർ? എന്ത് പുരോഗതി? ഭരണത്തിൽ നിന്ന് മതങ്ങളെ മാറ്റി നിറുത്താൻ സാധിച്ചില്ലെങ്കിൽ വീട് മുഴുവൻ ആയിരം വാട്ട് ബൾബുകൾ കൊണ്ട് കത്തിച്ചിട്ടും ബ്രോഡ് ബാന്റ് ഇന്റർനെറ്റും കൊണ്ട് എന്ത് പ്രയോജനം? ഒരേ നിലയും വിദ്യാഭ്യാസവുമുള്ള എന്റെ കൂട്ടുകാരി നിഷ അലിയ്ക്ക് ഒരു നീ‍തി, എനിക്ക് മറ്റൊരു നീതി, ലേഖ വിജയനു മറ്റൊരു നീതി - ഒരേ രാ‍ജ്യത്ത്.

എനിക്ക് ഒരിക്കലും മനസ്സിലാവാത്ത കാര്യമാണത്. ആയിരത്തിയഞ്ഞൂറ് ന്യൂനപക്ഷ കാരണങ്ങൾ ഇതിനു നിരത്തിയാലും നിഷ എന്തിനു എന്നേക്കാളും കൂടുതൽ ദുരിതം അനുഭവിക്കണം? അവളെന്തിനു 'നിയമപരമായി' അലിയുടെ മൂന്നാം ഭാര്യയാവണം? ഇതൊക്കെ കാട്ടിക്കൂട്ടുന്നത് തിന്നു കൊഴുത്തിരിക്കുന്ന എല്ലാ മതത്തിലേയും പുരോ‍ഹിത സമൂഹങ്ങൾ മാത്രമാണ്. അല്ലാതെ ഭൂരിപക്ഷം വരുന്ന സാധാരണക്കാരല്ല. എന്നിട്ടും ഈ അനീതി, ഈ കാട്ട് നീതി ഇന്ത്യ പോലെയൊരു രാജ്യത്തിൽ തുടർന്ന് കൊണ്ട് പോവുന്നതിന്റെ കാരണം?

ദേശീയോദ്ഗ്രഥനത്തിനു വേണ്ടത് ഹിന്ദിയല്ല, പകരം ജാതിഭേദമന്യേ ഒരേ തരം നിയമങ്ങളാണ്. സ്വാതന്ത്ര്യം കഴിഞ്ഞ് അറുപത് വർഷം കഴിഞ്ഞിട്ടും ഇന്ത്യൻ ഭരണഘടനയിലെ ആർട്ടിക്കിൾ 44 നിയമപ്രാബല്യത്തിൽ കൊണ്ട് വരാൻ സാധിക്കാത്തതും എല്ലാ വർഷവും ഏതെങ്കിലും കേസിന്റെ ഭാഗമായി കോടതികൾ ഇതിനു വേണ്ടി വിലപിക്കുന്നതും കണ്ടില്ലെന്ന് നടിക്കുന്നത് ജനദ്രോഹപരമെന്നല്ലാതെ പിന്നെയന്താണ്?

മതപ്രീണനം മറയില്ലാതെ നടത്തുന്ന കോൺ‌ഗ്രസ്സ് യൂണിഫോം സിവിൽ കോഡ് ജന്മത്ത് കൊണ്ട് വരുമെന്ന് പ്രതീക്ഷിക്കണ്ട. പുരോഗമനം വീമ്പടിക്കുന്ന മതപ്രീണനം ഒളിച്ചു നടത്തുന്ന കമ്മ്യൂണിസ്റ്റുകാരും ഇതിനെതിരാണ്. യൂണിഫോം സിവിൽ കോഡ് കൊണ്ട് വരാൻ വേണ്ടിയെങ്കിലും ആറ് മാസമെങ്കിൽ ആറ് മാസം ബിജെപി കേന്ദ്രത്തിൽ ഭരിക്കണമെന്ന് അറിയാതെ ആഗ്രഹിച്ചു പോവാറുണ്ടെന്ന് ഒരു കൂട്ടുകാരിയോട് പറഞ്ഞപ്പോൾ അവളെന്നെ കൊല്ലാൻ വന്നു. ഒരു നല്ല കാര്യത്തിനു വല്ലപ്പോഴും ചെകുത്താനെ കൂട്ട് പിടിക്കുന്നതിൽ തെറ്റില്ല എന്ന് എന്റെ പക്ഷം!

അമേരിക്ക, യൂറോപ്പ് ഇങ്ങിനെ പൊതുവെ ക്രിസ്ത്യൻ രാജ്യങ്ങളിലില്ലാത്ത നിയമങ്ങൾ ഇന്ത്യൻ ക്രിസ്ത്യാനികൾക്കുണ്ട്. തുർക്കിയിലോ, ഇറാനിലോ, ഈജിപ്തിലോ എന്തിനു പാകിസ്താനിൽ പോലുമില്ലാത്ത നിയമങ്ങൾ ഇന്ത്യയിൽ ഉണ്ട്. ഇവിടെയൊന്നും ഇല്ലാത്ത multiculturalism excuse ഇന്ത്യക്ക് വേണം. എന്താ ഒരു വിശാലത!