കാളകളുടെ രാഷ്ട്രീയം!

കരിമ്പനകൾ പോലും ചുവന്നു പോകുന്ന പാലക്കാടൻ ചൂടില്‍, വെയിലത്തു ഉണക്കാനിട്ട ചുവന്ന വള്ളിട്രൌസറിന്റെ തുളകളിലൂടെ ചോർച്ചകളുണ്ടാവുന്നുണ്ടെന്നു തെളിയിച്ച തിരഞ്ഞെടുപ്പുകാലമാണിത്. ഊർദ്ധ്വൻ വലിച്ചു കിടക്കുന്ന അമ്മാമ്മയെ വരെ പോളിങ്ങ് ബൂത്തിലേയ്ക്കു പൊക്കിയെടുത്തുകൊണ്ടുവരുന്ന പാർട്ടിസിപ്പേറ്ററി ജനാധിപത്യത്തിന്റെ ലിമിറ്റഡ് ടൈം ഓഫറുകാർ എക്സിറ്റ് പോളിൽ ഫലങ്ങള്‍ തങ്ങള്‍ക്കനുകൂലമല്ലെന്ന് അറിയുന്ന മാത്രയില്‍ അത് വരെ അടക്കിപ്പിടിച്ച തുക്കടവിപ്ലവവീര്യവും തെറിസമ്പത്തും അക്രമവാസനയും പുറത്തെടുക്കയാണ് പതിവ്. കൊടിയൂരി പിടിച്ച് സംസ്ഥാനവും പോലീസിനേയും ഭരിക്കുന്ന ഗുണ്ടകൾ ഉള്ളപ്പോൾ കയ്യില്‍ ഇരുന്നു പൊട്ടുന്ന ബോംബും, വിഷുകഴിഞ്ഞുള്ള വിഷുപ്പടക്ക നിര്‍മ്മാണവും തേച്ച് മാച്ചു കളയാന്‍ എളുപ്പമാണല്ലോ.

കേരളം ആവർത്തിച്ചുകണ്ടിട്ടുള്ള രാഷ്ട്രീയ്ര പൊറാട്ടുനാടകങ്ങളിലെ ഈ ചുവപ്പൻ തുക്കടവീര്യവും തെറിസമ്പത്തും ബ്ലോഗ്ഗന്നൂര്‍ താലൂക്കിലെ സഖാക്കള്‍ക്കും പുത്തിരിയില്ല എന്നു ഈയടുത്ത് ഒന്നുകൂടി കാണിച്ചു തന്നു. തിരഞ്ഞെടുപ്പ് കഴിയുന്നതിനു മുന്‍പ് ജനബോക്സറെ ഇറക്കി കളിച്ചവര്‍ തെരഞ്ഞെടുപ്പില്‍ വോട്ട് ചോര്‍ച്ചെയെന്ന് കേട്ടതോട് കൂടി പരിഭ്രാന്തരായി. മുക്രിയിട്ടോടുന്ന കാളകളെ ഭയന്ന് ചിതറിയോടുന്ന ജനക്കൂട്ടത്തെപ്പോലെ നാലു പാടും പാഞ്ഞ് നടന്ന് വീണ്ടും വീണ്ടും ഇവര്‍ അംഗബലം ഉറപ്പ് വരുത്തുകയാണ്. അതു മാത്രമോ നാട്ടിയ ചെങ്കൊടികളില്‍ ത്രിവര്‍ണ്ണം അലിഞ്ഞ് ചേര്‍ന്നാല്‍ പിന്നീട് വരുന്ന നാണക്കേടുകളില്‍ നിന്ന് സമര്‍ത്ഥമായി ഒഴിയുവാന്‍ ഇപ്പോള്‍ മദമിളകിയേ പറ്റൂ. പറശ്ശിനിക്കടവിലെ പാമ്പുകളെ തല്ലിക്കൊന്ന വിപ്ലവവീര്യമുള്ള, പുതിയ കോർപ്പറേറ്റ് നാലുകെട്ടുകൾക്കുള്ളിലെ ചുവപ്പു പട്ടുടുത്ത കാരണവന്മാര്‍, കാനഡയില്‍ നിന്നു വന്ന കാന്‍സര്‍ സെന്ററിലെ റേഡിയേഷന്‍ റൂമിലെ തണുപ്പുതട്ടിയതിൽ ഊറിക്കൂടിയ കഫക്കെട്ട് വീറോടെ നെഞ്ചില്‍ നിറക്കുന്നവരാണ്.

മതത്തിന്റെ വിഷ വിത്തുപാകി ജനത്തെ കബളിപ്പിക്കുന്ന മതാധിപത്യത്തിന്റെ കാവൽക്കാരെ തച്ചുടക്കാൻ പാഠപുസ്തകത്തിൽ മതേതരത്വം പ്രഖ്യാപിക്കപ്പെട്ടതിനു ജനം കൊടിയുടെ നിറം നോക്കാതെ ഒന്നായി അണിചേരുമെന്നു ഓർക്കാത്തതിന്റെ ഈർഷ്യയിലാവണം രഹസ്യ യോഗങ്ങളും രഹസ്യ ചർച്ചകളും സജീവമാക്കിയത്. സുതാര്യമല്ലാത്ത അത്തരം നീക്കങ്ങളെ ജനം പാടെ അവഗണിക്കുകയും സ്വതന്ത്രമായ ചിന്താബോധത്തോടെ അവരവരുടെ സിദ്ധാന്തങ്ങളും എതിർപ്പുകളും മറന്നു ഒരു രാഷ്ട്രീയത്തിനു വേണ്ടി നിലകൊണ്ടു. ഉദ്ദേശശുദ്ധിയില്‍ സന്ദേഹങ്ങളുണ്ടായിട്ടും അനീതിക്ക് കൊടിയുടെ നിറമില്ല എന്ന് മനസ്സിലാക്കി ജനം ഉറച്ച് നിന്നു. മതേതരത്വമെന്ന പാഠപുസ്തക രാഷ്ട്രീയത്തിന്റെ തനിനിറം പലപ്പോഴും സമര്‍ത്ഥമായി ഒളിപ്പിച്ച് വെച്ചിരുന്നത് വെളിപ്പെട്ടത്, ബൌദ്ധികമായി പ്രശ്നത്തെക്കുറിച്ച് തുറന്ന ചര്‍ച്ചയാരംഭിച്ച ഒരു ബ്ലോഗില്‍ സി‌പി‌എം എന്ന പാര്‍ട്ടിയുടെ പ്രൊപ്പഗാന്റക്കാര്‍ സ്നേഹപൂര്‍വ്വം ബൌദ്ധികമടവാളുമായി ഇറങ്ങിയപ്പോഴാണ്. എന്നിട്ടും ജനം പക്ഷങ്ങളെടുക്കാതെ നിലകൊണ്ടു.

മതേതരത്വത്തിന്റെ അപ്പോസ്തലന്മാരായി ആളുകളിച്ചാൽ മലപ്പുറത്ത് സീറ്റ് പോകുമെന്ന് പാര്‍ട്ടി ഇന്റലിജൻസിനു ബോധ്യം വന്നതോടെ പാഠപുസ്തകങ്ങള്‍ അവര്‍ തന്നെ വാരിക്കൂട്ടി പുതിയവ അച്ചടിക്കുകയായി. ഏ.കെ.ജി ഭവനിൽ നിന്നും ആൾദൈവങ്ങളാൽ ആശീർവദിക്കപ്പെട്ടു വരുന്ന വിപ്ലവകാവ്യങ്ങൾക്കു മറുമൊഴിയുണ്ടോ? മാറ്റിയ പാഠപുസ്തകങ്ങളെക്കുറിച്ച് വേവലാതിപ്പെടാതെ പെട്ടെന്ന് ചര്‍ച്ച നിറുത്തി മൂടും തട്ടി എഴുന്നേറ്റുപോവാന്‍ രണ്ടാമതൊന്ന് ആലോചിക്കേണ്ടി വന്നില്ല. പാര്‍ട്ടി എന്തു ചെയ്യുന്നുവോ അതുമാത്രമാണ് മതേരത്വം, അത് മാത്രമാണ് ശരി എന്ന് ബുദ്ധി അടിയറവെച്ച് ജീവിക്കുന്നവര്‍ക്ക് അങ്ങിനെയൊരു തലവിധിയാണ്. മതേതരത്വം ഒരു വിതുമ്പൽ പോലുമില്ലാതെ കമ്മ്യൂണിസ്റ്റ് റോമാന്റിസിസ്റ്റുകൾക്കു വെള്ളമടിക്കുമ്പോൾ തൊട്ടുനക്കാൻ പാകത്തിൽ കുപ്പിയിലടച്ച് വയ്ക്കപ്പെടുകയാണുണ്ടായത്. മദനിയെ കൂട്ടിക്കൊണ്ട് വന്ന് വിശുദ്ധീകരിച്ച്, മതേതരത്വമെന്നാല്‍ മതങ്ങളിലെ ഫസ്റ്റ് ക്ലാസ്സ് മതപ്രസംഗം പറയുന്ന ഐസ്ഫ്രൂട്ട് മനുഷ്യരെ കൂട്ടുപിടിക്കേണ്ടതാണെന്നു ഘോരഘോരം പ്രസംഗിച്ചു നടക്കേണ്ട ഗതികേട് ഈ ഏറാന്മൂളികള്‍ക്കിന്നുണ്ട്. അര്‍.എസ്.എസ്സുകാരായ രാമന്‍പിള്ളമാരെ മടിയില്‍ ഇരുത്തി താലോലിക്കാനും ശശികളെ താമരയില്‍ പ്രതിഷ്ഠിച്ചിരുത്തുവാനും അവരധ്വാനിച്ചത് ചില്ലറയല്ല. എന്തു നേരില്‍ കാണുന്നു നടക്കുന്നു എന്നല്ലല്ലോ പണ്ടു മുതലേയുള്ള പാര്‍ട്ടി നയങ്ങള്‍, നാളെയിലേക്കുള്ള ഭയപ്പെടുത്തലിലല്ലേ അവര്‍ ജീവിച്ച് പോവുന്നത്?

കൈവിരലിലെ വോട്ടടയാളം ഉയർത്തിക്കാണിച്ചാൽ മാത്രം പോരാ ഓരോ പൗരന്റെ തലയ്ക്കുമുകളിലും വോട്ട് ഫോർ ബാഡ്ജൊട്ടിച്ചു ഒന്നും രണ്ടും കിഴിച്ചുനോക്കി പെട്ടിതുറക്കുമ്പോൾ വോട്ട് കണ്ടില്ലെങ്കിൽ തലതെറിച്ചേയ്ക്കാവുന്ന ബംഗാളിന്റെ കണ്ണൂർ അനുജന്മാരുടെ ആവർത്തനങ്ങൾ ബ്ലോഗുകളിലും വരുത്തുവാൻ ചിലർ അത്വധാനം ചെയ്തിരുന്നു. അരാഷ്ട്രീയവാദികളേ, കമ്പ്യൂട്ടർ ഉപയോഗിക്കുന്ന ദുർന്നടുപ്പുകാരേ നിങ്ങളിനി മിണ്ടണമെങ്കില്‍ നിങ്ങളുടെ ഉടുതുണി പൊക്കിക്കാണിച്ചേ മതിയാവൂ എന്നവർ ഫത്വകള്‍ മുഴക്കി. ഉടുതുണി പറിച്ച് കൊടികള്‍ നാട്ടിയപ്പോള്‍ ജനം കൂടുമെന്ന് ഇവര്‍ കണക്കുകൂട്ടി, കൂക്കു വിളിക്കുമെന്ന് മനപ്പായസമുണ്ടു. ഒന്നും സംഭവിച്ചില്ല.

എനിക്കു രാഷ്ട്രീയമില്ലായെന്ന് പണ്ടൊരികല്‍ ഉറക്കെ പ്രഖ്യാപിച്ചിരുന്ന ഒരു ബ്ലോഗറോട് മാത്രം തികഞ്ഞ അച്ചടക്കത്തോടെ തികഞ്ഞ മാന്യതയോടെ ജനം ചോദ്യങ്ങള്‍ ആരാഞ്ഞു, ഉത്തരത്തില്‍ സംതൃപ്തരാ‍യി. ബാക്കിയുള്ള കൊടികള്‍ക്ക് കീഴില്‍ അളു കൂടിയില്ല. കൂടുമ്പോള്‍ കല്ലെറിഞ്ഞും പുലഭ്യം പറഞ്ഞും ഓടിക്കാമായിരുന്നെന്ന മനപ്പായസങ്ങളില്‍ പാറ്റകള്‍ പറന്നു വീണു ചത്തുപൊങ്ങി. ജനാധിപത്യത്തില്‍ ഒരു പട്ടിക്കുഞ്ഞിനോടു പോലും ആര്‍ക്ക് വോട്ട് ചെയ്യുമെന്നോ ആര്‍ക്ക് വേണ്ടി വോട്ട് പിടിക്കണമെന്നോ പറയണമില്ലായെന്ന് കക്ഷത്തില്‍ മാത്രം രാഷ്ട്രീയം കാണുന്നവര്‍ക്ക് അറിയാതെ പോയി. ഉടുതുണി അഴിച്ച് അയയില്‍ തൂക്കുന്നതാണ് രാഷ്ട്രീയമെന്ന് പതപ്പിച്ച് വിടുന്ന വായകളില്‍ നിന്നു ഭീഷണിയുടേയും പുച്ഛത്തിന്റെയും സ്വരം മുഴങ്ങി. ഇതിനൊന്നും പുല്ലു വില പോലും കല്പിക്കാതെ തികഞ്ഞ സ്വാതന്ത്ര്യബോധ്യത്തില്‍ ജനാധിതപത്യത്തിന്റെ ഉത്തമബോധ്യത്തില്‍ ജനം ഉറച്ച് നിന്നു. ഇവരാകട്ടെ ഉടുതുണി അഴിച്ചു കാണിച്ചും പോയി ഭീഷണിക്കൊട്ട് ജനം വഴങ്ങുന്നുമില്ലായെന്ന് കണ്ട് അസ്വസ്ഥരായത് വെറുതെയല്ല. ഹിന്ദുവാണോ മുസ്ലീമാണോ എന്നറിയുവാന്‍ ഉടുതുണി അഴിച്ച് നോക്കി കൊല്ലുന്നവരുണ്ട്, അതിലൂടെ രാഷ്ട്രീയം സ്ഥാപിക്കുന്നവരുണ്ട്. അങ്ങിനെ ജനങ്ങളുടെ ഉടുതുണിയിലെ നിറം വെച്ച് ഒരു ഗ്യാസ് ചേമ്പറില്‍ തള്ളിക്കയറ്റി പുകക്കാമെന്ന് സ്വപ്നം കണ്ടതെല്ലാം നിമിഷം കൊണ്ടാണ് വിഫലമായത്. സഹിക്കുമോ?

പബ്ബുകളിലെ കൂടിക്കാഴ്ചകളില്‍ സംഘത്തലവന്മാരുടെ കിറികളില്‍ നുരഞ്ഞു പൊന്തുന്നത് ടിഷ്യൂ പേപ്പറില്‍ തുടച്ചെടുത്ത് പകര്‍ത്തിയെടുത്തും കീഴ്‌ശ്വാസങ്ങളില്‍ വിരിയുന്ന ഭാവനകള്‍‍ പൊതിഞ്ഞെടുത്തും അതില്‍ ചരിത്രം കുറിക്കാമെന്ന് നാട്യത്തില്‍ അരങ്ങേറുന്ന പ്രൊപഗാന്റകള്‍ക്ക് ഒരു നിറമേയുള്ളൂ, ഒരു ലക്ഷ്യമേയുള്ളൂ. കക്ഷ രാഷ്ട്രീയം. പ്രസ്തുത ചരിത്രകാരന്മാര്‍ കുറിച്ച് വെച്ചതില്‍ ഒരു കാര്യം ശരിയാണ്. കുറച്ച് നാള്‍ക്ക് മുന്‍പ് കക്ഷത്തില്‍ നിന്നു മാത്രം മുളച്ചു പൊന്തുന്ന രോമങ്ങളുടെ മാത്രം രാഷ്ട്രീയം മണപ്പിച്ച് ഹരം കൊള്ളുന്നത് ബ്ലോഗില്‍ വളരെയധികം കുറവായിരുന്നു. മനുസ്മൃതിയ്ക്ക് പുതിയൊരു മാനം കൊടുത്തപ്പോള്‍ അവിടെ ചര്‍ച്ച ചെയ്തിരുന്നവര്‍ ഒരിക്കല്‍ പോലും ലേഖകനോട് ധരിക്കുന്ന ചഡ്ഡിയുടെ നിറം കാവിയാണെന്ന് ആരോപിക്കാന്‍ തുനിഞ്ഞില്ല. അല്ലെങ്കില്‍ കൊക്കോകോളയ്ക്കെതിരെ എഴുതിയപ്പോള്‍ അന്നത്തെ ചര്‍ച്ചയിലും ചെങ്കൊടിയോ ത്രിവര്‍ണ്ണമോ വിഷയം വന്നില്ല. ചര്‍ച്ച ഒരു രാഷ്ട്രീയപ്പാര്‍ട്ടിയുടേയും കുത്തകയില്‍ നിറുത്തിയില്ല. ഒരു പാര്‍ട്ടിയുടേയും പ്രൊപ്പൊഗേന്റാ മെഷീനറി ആയിരുന്നില്ല അന്ന് ബ്ലോഗുകള്‍. അതില്‍ നിന്ന് ഇന്നത്തെ നിലയിലേക്ക് അഴുക്കുചാലുകള്‍ സൂത്രധാരന്മാര്‍ പല കൈവഴിയിലേക്ക് വെട്ടിക്കീറിയിട്ടുണ്ട് എന്ന് സമ്മതിക്കാതെ വയ്യ. അധികാരം കിട്ടുവാന്‍ വേണ്ടിയുള്ള ഞാണിന്മേല്‍ കളിയില്‍ വിലകുറഞ്ഞകഥകള്‍ അടിച്ചിറക്കുകയും അതിലൂടെ കക്ഷത്തില്‍ രോമം കിളിര്‍പ്പിക്കുകയും അത് വെട്ടി മൂക്കിനു താഴെ ഒട്ടിച്ച് ഞങ്ങള്‍ ഓടകള്‍ കീറി എന്ന് അഭിമാനിച്ച് നടക്കുകയും ചെയ്യുന്നു. ജനം അവരെ കണ്ടതായിപ്പോലും നടിച്ചില്ല, അതുകൊണ്ട് കൂലികയെഴുത്തുകാരെ ഒളിയമ്പെയ്യാനും ഓപ്പണ്‍ ഹൌസ് നടത്താനും നാട് നീളെ പ്രതിഷ്ഠിച്ചു, ലിയോനാര്‍ഡോ ഡാവിഞ്ചി കോഡുകകളില്‍ കാറ്റൂതിയും ഇംഗ്ലീഷ് സിനിമാ മാത്രം കണ്ടും നടക്കുന്നവര്‍ക്ക് അപസര്‍പ്പക കഥകള്‍ക്കാണോ പഞ്ഞം? അവിടെന്നിന്നും ഇവിടെനിന്നും കഥകള്‍ വെട്ടിയൊട്ടിച്ച് അതില്‍ ഫ്യൂഡല്‍ വിഷം ഒളിപ്പിച്ച് അത് ചെങ്കൊടിയുടെ നിറത്തില്‍ പൊതിഞ്ഞാ‍ല്‍ നവഫ്യൂഡലിസ്റ്റുകളെ ജനം മനസ്സിലാക്കില്ലായെന്ന് കരുതാന്‍ മാത്രം പമ്പരവിഡ്ഡികളാണവര്‍.

കക്ഷങ്ങളെക്കുറിച്ച് സംസാരിക്കുമ്പോഴാണ് കക്ഷം കാണിക്കുന്ന മദാലസകള്‍ക്ക് കിട്ടേണ്ടത് കിട്ടിയെന്ന മട്ടിലുള്ള രാഷ്ട്രീയം പ്രസംഗിച്ചവരെക്കുറിച്ച് ഓര്‍ത്തത്. അവരുടെ കക്ഷങ്ങളില്‍ ഷൊവനിസത്തിന്റെ കുരുക്കള്‍ പൊട്ടിയൊലിക്കുന്നത് തടയിടാനാണ് ഇവര്‍ ചെങ്കൊടി പുതയ്ക്കുന്നത്. ആയിരങ്ങള്‍ ചോരച്ചാലുകള്‍ നീന്തിക്കയറിയ ചെങ്കൊടികള്‍ ഇവര്‍ക്ക് സ്വന്തം ഫാസിസ്റ്റ് അജണ്ടകള്‍ നടപ്പിലാക്കാനും മാടമ്പികള്‍ ചമയാനുമുള്ളതാണ്. പാര്‍ട്ടിയിലെ ഫ്യൂഡല്‍ പ്രഭുക്കള്‍ അഴിമതിയില്‍ ചീഞ്ഞളിഞ്ഞ് വിസര്‍ജ്ജിക്കുമ്പോള്‍ അവയെ വെള്ളത്തുണിയില്‍ പൊതിയുവാനും അതിന്റെ ദുര്‍ഗ്ഗന്ധത്തിനെതിരെ ശബ്ദം പൊന്തിക്കുന്നവരെ തലയക്ക് വെളിവില്ലാത്തവരെന്ന് പ്രഖ്യാപിച്ച് തുറങ്കലിലടച്ച് ഷോക്ക്ട്രീറ്റ്മെന്റ് നടത്തുവാനും ഇവര്‍ ഉത്സാഹിക്കും. വേണമെങ്കില്‍ ആ വിസര്‍ജ്ജ്യം ഇവര്‍ കോരി കുടിക്കുകയും അതില്‍ കുളിക്കുകയും ചെയ്യും. ഫ്യൂഡലിസം അങ്ങിനെ തേച്ചാലും മായ്ചാലും പോവുന്നതല്ലല്ലോ. അതേ സമയം ഫ്യൂഡല്‍ പ്രഭുക്കളേയും അവയുടെ രാജവെമ്പാലകള്‍ക്കു മുന്നിലും ഇവര്‍ ഓച്ചാനിച്ച് നില്‍ക്കും. അവര്‍ക്കവരെക്കൊണ്ട് കാര്യമുണ്ട്. അവരില്ലെങ്കില്‍ പാര്‍ട്ടിയില്ല. കൊക്കോകോളയ്ക്കും പിന്നീട് വര്‍ഷങ്ങള്‍ക്ക് ശേഷം പെപ്സിക്കും പാലക്കാടന്‍ മണ്ണില്‍ ലൈസന്‍സ് കൊടുത്തവര്‍ തന്നെ പിന്നീട് ബൂര്‍ഷ്വാകള്‍ക്കെതിരെ സമരം നടത്തി കണ്ണില്‍ പൊടിയിടാന്‍ ശ്രമിക്കുന്നില്ലേ? ബൂര്‍ഷ്വാസിയുടെ ചെരുപ്പ് നക്കുവാനും വെളിയില്‍ ചെന്ന് അവനെ ഞാന്‍ ചെരുപ്പ് കൊണ്ടടിച്ചുവെന്ന് യാതൊരു ഉളുപ്പുമില്ലാതെ ജനങ്ങളോട് പറയുവാനും ഇവര്‍ക്കുള്ള സാമര്‍ത്ഥ്യവും തൊലിക്കട്ടിയും എന്നേ തെളിഞ്ഞതാണ്.

വിവരസാങ്കേതികവും അതിലൂടെ സൃഷ്ടിക്കപ്പെടുന്ന വിജ്ഞാനത്തിന്റെ വിപ്ലവവും വിജ്ഞാനത്തിന്റെ സോഷ്യലിസവും ഇവരെ പരിഭ്രാന്താരാക്കാറുണ്ട്. ഗൂഗിളും വിക്കിയും ഇവരെ ഭയചികിതരാക്കും. പാര്‍ട്ടി ലഘുലേഖകളില്‍ പൂഴ്ത്തിവെക്കുപ്പെടുന്ന നുണകളെക്കുറിച്ച് ജനങ്ങള്‍ ചോദ്യങ്ങള്‍ ചോദിച്ചു തുടങ്ങി. ചെങ്ങറിയില്‍ നിങ്ങള്‍‍ ചെയ്തതെന്ത്? നന്ദിഗ്രാമില്‍ ചെയ്യുന്നതെന്ത്? സിംഗൂരിലെ ഗ്രാമങ്ങളെവിടെ? നിങ്ങളുടെ ഫ്യൂഡല്‍വിപ്ലവത്തിനു എത്രപേര്‍ കൂടി ചത്തൊടുങ്ങണമെന്ന് ജനങ്ങള്‍ വിരല്‍ ചൂണ്ടി ചോദ്യങ്ങള്‍ ഉന്നയിക്കുവാന്‍ തുടങ്ങി.

പാര്‍ട്ടിയുടെ കൊടിയുടെ കീഴിലല്ലാതെ ജനങ്ങള്‍ സംഘടിക്കുന്നത് ധാര്‍ഷ്ട്ര്യത്തോടെ അടിച്ചൊതുക്കുന്നതായാണ് ചരിത്രം നമ്മെ പഠിപ്പിക്കുന്നത്. ദളിതര്‍, കര്‍ഷകര്‍, തൊഴിലാളികള്‍, ഫെമിനിസ്റ്റുകള്‍, ന്യൂനപക്ഷക്കാര്‍, ജനാധിപത്യവിശ്വാസികള്‍ ഇവരെല്ലാം പാര്‍ട്ടിക്കൊടിയിലല്ലാതെ സംഘടിച്ചപ്പോള്‍ ഭരണമുള്ള രാജ്യങ്ങളിലും സംസ്ഥാനങ്ങളിലും രാജവാഴ്ചയെ നാണിപ്പിക്കും വിധം അവരെ കൊന്നുതള്ളിയവരണിവര്‍. അതുകൊണ്ട് തന്നെ ജനങ്ങളുടെ വിജ്ഞാനവും ശബ്ദവും പ്രതിരോധിക്കാനാവണം വിക്കി വിവരമെന്നും ഗൂഗിള്‍ പാണ്ഡിത്യമെന്നും കുട്ടി സഖാക്കന്മാര്‍ മീശ വിറപ്പിച്ച് തുടങ്ങിയിരിക്കുന്നത്. ലോകത്തിലെ ലൈബ്രറികളും റിസേര്‍ച്ച് പേപ്പറുകളും ബിറ്റ്സിന്റേയും ബൈറ്റ്സിന്റേയും ലോകത്തിലേക്ക് എത്തിത്തുടങ്ങുന്നത് ഇവരറിഞ്ഞിട്ടില്ല, ഇപ്പോഴും പത്തൊന്‍പതാം നൂറ്റാണ്ടിലെ തത്വങ്ങളില്‍ മുറുക്കെപ്പിടിച്ച് സ്റ്റാലിനു മുന്നില്‍ മെഴുകുതിരി കത്തിക്കുന്നവര്‍ ജീവിക്കാന്‍ പാടുപെടുന്ന ചായക്കടക്കാരെ വരെ ബൂര്‍ഷ്വാസി എന്ന വലയില്‍ കുരുക്കുന്നതില്‍ ആ‍നന്ദിക്കുന്നവരാണ്. അതുകൊണ്ടാണ് കാളകള്‍ ചുവപ്പ് കണ്ടല്ല വിരളുന്നതെന്ന ബേസിക്ക് സയന്‍സ് പോലും ഇവര്‍ക്ക് വശമില്ലാതെ പോയത്.

കാളകള്‍ക്ക് വെള്ളയും കറുപ്പുമല്ലാതെ നിറങ്ങള്‍ കാണുവാന്‍ സാധിക്കില്ല. സാമാന്യ നീതി നിഷേധിച്ചും പട്ടിണിക്കിട്ടും ഉപദ്രവിച്ചും ക്രൂരമായ ദേഹോദ്രപവമേല്‍പ്പിച്ചും അവയെ കൂട്ടിലടയ്ക്കപ്പെടുന്ന പിക്കാഡര്‍മാര്‍ അവരെ‍ തുറന്നു വിടുന്നമ്പോള്‍ ജനാധിപത്യത്തിന്റെ സ്വതന്ത്രവായു ശ്വസിക്കുന്ന പരവേശമാണ് ചെങ്കൊടി കണ്ടിട്ടുള്ള വിരളലാണെന്ന് വിഡ്ഡികള്‍ ധരിച്ച് വെച്ചിരിക്കുന്നത്. ചെങ്കൊടിയല്ല ഏത് നിറത്തിലെ കൊടി പാറിച്ചാലും കാളകള്‍ മുക്രിയിടും. സ്വാതന്ത്ര്യത്തിനു വേണ്ടി ജീവനൊടുക്കാന്‍ വരെ തയ്യാറായി നില്‍ക്കുന്ന കാളകള്‍ക്ക് മുന്നില്‍ ചെങ്കൊടി പാറിക്കുന്നത് പിന്നില്‍ നിന്ന് കുന്തം കൊണ്ട് കുത്തി കൊല്ലുന്ന കാളകളുടെ രക്തം ജനങ്ങളില്‍ നിന്ന് മറച്ചുപിടിക്കുവാനാണ്. ചെങ്കൊടിയുടെ പിന്നിലൊളിച്ച് നില്‍ക്കുന്ന മെറ്റാഡോര്‍മാര്‍ കാളകളെ തങ്ങളാണ് കൊല്ലുന്നതെന്ന നുണയില്‍ അഭിരമിക്കുന്നവരാണ്. കുന്തം കൊണ്ട് കുത്തിക്കൊല്ലുന്ന കാളകളെ തങ്ങള്‍ കൊന്നുവെന്ന് ഇവര്‍ നാട് നീളെ വീരസ്യം മുഴക്കും. ഫ്യൂഡല്‍ മാടമ്പികളുടെ മുന്നില്‍ തലച്ചോര്‍ പണയം വെച്ച് കോമാളിവേഷമണിഞ്ഞ് വരുന്ന ഇവര്‍ക്ക് ആത്മവിശ്വാസം തെല്ലും കുറവില്ല. ചിന്താശേഷിയില്ലാത്തവര്‍ക്ക് ആത്മധൈര്യവും ആത്മവിശ്വാസവും അളവില്‍ക്കൂടുതല്‍ കാണും. ഫ്യൂഡലിസ്റ്റുകളുടെ വിനോദത്തിനു വേണ്ടി കാളകളെ ഉപദ്രവിച്ചും അവര്‍ക്ക് മുന്നില്‍ ഉടുതുണി പറിച്ചെറിയാന്‍ വിലയ്ക്ക് വാങ്ങപ്പെട്ട മറ്റഡോര്‍മാരും സൃഷ്ടിക്കുന്ന കലുഷിത അന്തരീക്ഷത്തില്‍ ജയിക്കുന്നത് എപ്പോഴും തലയുയര്‍ത്തിപ്പിടിച്ച് വീരമൃത്യു പൂകുന്ന കാളകളാണ്. പിന്നില്‍ നിന്ന് കുത്തിക്കൊല്ലുന്നതുവരെ അവര്‍ അനീതിക്ക് നേരെ പോരാടിക്കൊണ്ടിരിക്കും. സ്വാതന്ത്ര്യത്തിനു വേണ്ടി ഫ്യൂഡലിസ്റ്റുകള്‍ക്കെതിരെ ഫാസിസ്റ്റുകള്‍ക്കെതിരെ സധൈര്യം ശബ്ദം ഉയര്‍ത്തും. കാളകള്‍ ചിന്തുന്ന രക്തത്തില്‍ മെറ്റഡോര്‍മാരുടെ കണ്ണുകള്‍ക്ക് കാഴ്ച ലഭിക്കട്ടെ. കാളകളുടെ ലിംഗങ്ങള്‍ ഭക്ഷിച്ച് അവര്‍ക്ക് ബുദ്ധി തെളിയട്ടെ. ജനിക്കാന്‍ പോകുന്ന പുതിയ കാളകളെയെങ്കിലും കൂട്ടിലടയ്ക്കപ്പെടാതെയിരിക്കുവാന്‍ പടപൊരുതി മരിക്കുന്ന കാളകളേ നിങ്ങള്‍ക്ക് അഭിവാദ്യങ്ങള്‍!


II

ഈ ലേഖനത്തിന്റെ ആദ്യത്തെ ഭാഗം വായിക്കുമ്പോള്‍ എന്തു തോന്നുന്നു? പല സത്യങ്ങളും അതിന്റെ കൂടെ അസത്യങ്ങളും പൊടിപ്പും തൊങ്ങലും ആവശ്യത്തിലധികം വികാരവും കുറച്ച് സ്ഥിരം ക്ലീഷേ വാക്കുകളും ഉപയോഗിച്ച് തറ പറ എന്ന് എഴുതാന്‍ മാത്രമറിയാവുന്ന ആര്‍ക്കും ഉണ്ടാക്കിയെടുക്കാന്‍ സാധിക്കുന്ന ഒന്നാണത്. ഇങ്ങിനെയുള്ളതിനെ നമുക്ക് കൊഴുക്കട്ട ലേഖനം എന്ന് വിളിക്കാം. അതായത് കൊഴുക്കട്ട ഉണ്ടാക്കുമ്പോള്‍ ശര്‍ക്കരയും തേങ്ങയും സമാസമം ചേര്‍ക്കണം. തേങ്ങയാണ് ഇതിലെ പോയിന്റുകള്‍. നിങ്ങള്‍ക്ക് പറയാനുള്ള ഒരു പോയിന്റ് എടുക്കുക. ഇവയില്‍ ആവശ്യത്തിനു ശര്‍ക്കര ചേര്‍ക്കുക. നമ്മുടെ ശര്‍ക്കരയാണ് വികാരങ്ങളും, അസത്യങ്ങളും എങ്ങും തൊടാതെയുള്ള ആരോപണങ്ങളും. എന്നിട്ട് ഇവയെ ചൂടുവെള്ളത്തില്‍ കുഴച്ച അരിമാവില്‍ പൊതിഞ്ഞ് എടുക്കുക. സ്ഥിരം കാണുന്ന കുറച്ച് ക്ലീഷേകള്‍, പ്രയോഗങ്ങള്‍, ഉപമകള്‍ ഉപയോഗിക്കുക. ശര്‍ക്കരയേക്കാളും തേങ്ങയേക്കാളും രണ്ടിരട്ടിയാണ് അരിമാവ് വേണ്ടത്. ഫ്യൂഡലിസം, അരാഷ്ട്രീയം, ഫാസിസം, രഹസ്യം, പാമ്പ്, കുറുനരി, കഴുകന്‍, വേട്ടപ്പട്ടികള്‍, വിസര്‍ജ്ജ്യം , കീഴ്‌ശ്വാസം, ശവം തീനികള്‍ ഇങ്ങിനെയുള്ള വാക്കുകളും മറ്റും ചേരുന്നതാണ് അരിമാവ്. ഇതിലെ സുപ്രധാന കണ്ണിയാണ് ജനം. ഇതൊരിക്കലും മിസ്സാവരുത്. ഈയൊരു വാക്കിലൂടെ നേടുന്നത് പത്തോ പതിനഞ്ചോ അല്ല, എണ്ണിയാല്‍ ഒടുങ്ങാത്ത ജനപ്രവാഹമാണ്. ഇത് എപ്പോഴും നമ്മുടെയൊപ്പം എന്ന രീതിയില്‍ എഴുതുക. ഈ വാക്കുകളില്‍ നമ്മുടെ ശര്‍ക്കരയും തേങ്ങയും സമര്‍ത്ഥമായി പൊതിഞ്ഞെടുക്കുക. ഒരുപാട് വലിയ ഉരുളകളാവരുത് എന്നതു പ്രത്യേകം ശ്രദ്ധിക്കണം. അവ വേവില്ല. വേവാത്തവ ദഹനക്കേടുണ്ടാക്കും. ചെറിയ ചെറിയ പാരഗ്രാഫുകളാണ് ചെറിയ ചെറിയ ഉരുള‍കള്‍. ഒരു പോയിന്റ് ഒരു പാരഗ്രാഫിലേ എഴുതാവൂ. ശ്രദ്ധിക്കുക, രണ്ട് പോയിന്റ് കുത്തിനിറച്ചാല്‍ അവ വേവില്ല.

കൌമാരത്തിനു ശേഷം രാഷ്ട്രീയ ലേഖനങ്ങള്‍ വായിച്ചിട്ടില്ലാത്തവരോ അല്ലെങ്കില്‍ ദേശാഭിമാനി ലേഖനങ്ങളിലൂടെ മാത്രം രാഷ്ട്രീയം വായിക്കുന്നവരോ ഈ കൊഴുക്കട്ടകളുടെ മുന്നില്‍ സാഷ്ടാംഗം നമസ്കരിക്കും. ഇവരാണ് അപ്പച്ചെമ്പില്‍ കൊഴുക്കട്ട വേവിക്കുന്നവര്‍. കൊഴുക്കട്ട കുഴച്ച് ഉരുളകളാക്കി മുന്നില്‍ വെച്ച് കൊടുത്താല്‍ മതി, ഇവര്‍ അത് കമന്റിലൂടെ ചൂടാക്കി വേവിച്ചുകൊള്ളും. നിങ്ങള്‍ക്കും ഏത് കാളകള്‍ക്കും ഇതുപോലെയൊന്ന് എളുപ്പത്തിലെഴുതാം. തീ‍രെ അസത്യം പറഞ്ഞോ വ്യക്തികളെ ഫോക്കസ് ചെയ്തോ എഴുതി പരിചയമില്ലെങ്കില്‍ ആദ്യത്തെ രണ്ട് മൂന്ന് വട്ടം അധികം നല്ല കൊഴുക്കട്ടകള്‍ ലഭിക്കില്ല. പക്ഷെ അത് പോകെപ്പോകെ ശരിയായിക്കൊള്ളും. രണ്ട് മൂന്ന് വട്ടം കഴിയുമ്പോള്‍ മാവിന്റെ അയവും, കൊഴുക്കട്ടയുടെ രൂപവും, ശര്‍ക്കര പൊട്ടിയൊലിക്കാതേയും നിങ്ങള്‍ക്കും ഭംഗിയായി ഇവ നിര്‍മ്മിക്കാം.

കൊഴുക്കട്ടയുടെ ശര്‍ക്കര തീരുമ്പോള്‍ ഉണ്ടാക്കുന്ന ഒന്നാണ് പീച്ചപ്പൊടി. ഇതില്‍ ബാക്കി വന്ന നുള്ള് ശര്‍ക്കരയും മറ്റും ചേര്‍ക്കാം, പക്ഷെ അരിമാവാണ് ഇതില്‍ കൂടുതല്‍. അവയ്ക്ക് കൊഴുക്കട്ടയുടെ മധുരമില്ല. പീച്ചപ്പൊടി ലേഖനങ്ങള്‍ ഏത് കൊച്ചുകുട്ടിക്കും നിര്‍മ്മിക്കാം. സാധാരണ കൊച്ചുകുട്ടികള്‍ക്കാണ് പീച്ചപ്പൊടി നിര്‍മ്മിക്കുവാന്‍ വീടുകളില്‍ അനുവാദം. പോയിന്റുകളേ വേണ്ട എന്നതാണ് ഇവയുടെ പ്രധാന ഗുണം. ആദ്യം തികച്ചും പൊള്ളയായ വാദങ്ങള്‍ എടുക്കുക. മറ്റെങ്ങും വിലപ്പോവില്ലാത്ത വാദങ്ങളായ “ബസ് കത്തിക്കുന്നത് വെറും പൊതുമുതല്‍ നശിപ്പിക്കുന്നതല്ലേ” എന്ന് ചോദിക്കുക, കൂടെ നാലു സെന്റി ഡയലോഗായ, അ) അന്ന് ബസ്സ് കത്തിച്ചപ്പോള്‍ ഓടി രക്ഷപ്പെട്ട കുഞ്ഞുങ്ങളെ രക്ഷിച്ചെടുത്തത് ഓര്‍മ്മയില്ലേ? ബി)കത്തുന്ന തീയില്‍ വെള്ളമൊഴിച്ചവരെ ഓര്‍മ്മയില്ലേ? ഇത്യാദി ചേര്‍ക്കുക. രാഷ്ട്രീയമോ ന്യായങ്ങളോ നാലയലത്ത് പോലും പോകണ്ട ആവശ്യമില്ല. പീച്ചപ്പൊടി കഴിക്കാന്‍ പൊതുവേ അധികം ആള്‍ത്തിരക്കുണ്ടാവില്ലെങ്കിലും അവ കൊഴുക്കട്ടകള്‍ക്ക് ഒപ്പം വേവണമെന്നത് ഒരു പാരമ്പര്യമാണ്. ഈ പീച്ചപ്പൊടി കഴിക്കുന്നവര്‍ കാല്പനിക രാഷ്ട്രീയം ഇഷ്ടപ്പെടുന്നവരാണ്. അവരാണ് ചെഗുവേരയ്ക്ക് മുന്നില്‍ മുട്ടുകുത്തി ചെഗുവേരയുടെ ടീഷര്‍ട്ടിട്ട് ‘ചെയുടെ രാജ്യം വരേണമേ’ എന്ന് മുടങ്ങാതെ ‍നൊവേന ചൊല്ലുന്നവര്‍‍. അവര്‍ വിരാജിക്കുന്നത് നല്ല കാലത്തിന്റെ ഓര്‍മ്മകളിലാണ്. ഇന്ന് എന്തു നടക്കുന്നു എന്ന് ഇവര്‍ക്ക് എത്തും പിടിയുമില്ല. ‘ഓര്‍മ്മയില്ലേ?’ എന്ന ചോദ്യം മുതലേ ഇവര്‍ ദിവാസ്വപ്നം കണ്ട് തുടങ്ങും. പീച്ചപ്പൊടിയില്‍ മധുരമില്ല എന്ന് പോലും അവരതുകൊണ്ട് ശ്രദ്ധിക്കില്ല.

എന്നെപ്പോലെ ഇങ്ങിനെയുള്ള ഭാഷ അധികം വശമില്ലാത്തവര്‍ക്ക് റെഫറന്‍സായി എടുക്കാവുന്നവയാണ് ദേശാഭിമാനി ലേഖനങ്ങള്‍. ഇതിന്റെ ഭാഷയുടെ ടോണ്‍ കിട്ടുവാന്‍ ഞാന്‍ മൂന്ന് ദേശാഭിമാനി ലേഖനങ്ങള്‍ അടുപ്പിച്ച് വായിച്ചു, ഹെറാള്‍ഡോ റിവേറാ എന്ന ഫോക്സ് ന്യൂസ് ആങ്കറേയും മനസ്സില്‍ ധ്യാനിച്ചു, ഒറ്റയിരുപ്പില്‍ എഴുതി. ആദ്യമായി ഇങ്ങിനെ എഴുതിയതിന്റെ നൂനതകള്‍ ഉണ്ടെന്നറിയാം, ഇത് ശീലമാക്കാന്‍ ഉദ്ദേശിക്കുന്നുമില്ല. പക്ഷെ ബ്ലോഗിലെ പൈങ്കിളി രാഷ്ട്രീയ ലേഖനങ്ങളുടെ അല്‍‌ഗോരിതം ഒന്ന് ഡീകണ്‍‌സ്റ്റ്രക്റ്റ് ചെയ്യണമെന്ന് ഒരു അക്കാഡമിക്ക് താല്പര്യം ഉള്ളതുകൊണ്ട് ശ്രമിച്ചതാണ്. ;-)