വിഷാദരോഗം

വിഷാദരോഗത്തെക്കുറിച്ച് വിശദീകരിക്കുന്നതിനു മുന്‍പ്, ആദ്യം അടുത്തറിയാവുന്ന ഒരാളുടെ അനുഭവം പറയാം.

സെപ്റ്റം‌ബര്‍ 11, 2001 -ല്‍ ന്യൂയോര്‍ക്കില്‍ ഒസാമാ ബിന്‍ലാദിന്റെ നേതൃത്വത്തില്‍ വിതച്ച നാശത്തില്‍ ഒരു സുഹൃത്തിന്റെ ഭര്‍ത്താവ് മരിക്കുന്നു. ഭാര്യയും ഭര്‍ത്താവും ഒരേ കമ്പനിയില്‍ ജോലി ചെയ്തിരുന്നവരാണ്. വിവാഹം കഴിഞ്ഞ് ഒരു കൊല്ലത്തോളമാവുന്നതേയുള്ളൂ. നാട്ടില്‍ നിന്ന് ന്യൂ യോര്‍ക്കിലേക്ക് താമസം മാറ്റിയിട്ട് ആറ് മാസവും. ആദ്യം പതിവുള്ള സങ്കടവും കരച്ചിലും മൌനവും എല്ലാം കാണിച്ചതിനു ശേഷം രേവതി (അവളെ അങ്ങിനെ വിളിക്കാം) ഓഫീസിലേയ്ക്ക് ഒരു മാസത്തിനു ശേഷം മടങ്ങി. രേവതിയുടെ വീട്ടുകാരും ഭര്‍ത്താവിന്റെ വീട്ടുകാരും സംഭവത്തിനു ശേഷം രേവതിയുടെ ഒപ്പമുണ്ടായിരുന്നു. രേവതി പതിവ് ദിനചര്യകളിലേയ്ക്ക് മടങ്ങിയെന്ന് മകളോടൊപ്പം കുറച്ച് മാസം താമസിച്ച് ഉറപ്പ് വരുത്തിയതിനു ശേഷം വീട്ടുകാര്‍ മടങ്ങുന്നു. രേവതി പഴയതു പോലെ ചിരിക്കുവാനും കളിക്കുവാനും സംസാരിക്കുവാനും എല്ലാം തുടങ്ങുന്നു. രേവതി ഒരു കൂട്ടുകാരിയുടെ വീട്ടിലേയ്ക്ക് താമസം മാറ്റുന്നു. ഒരാഴ്ചയ്ക്കുള്ളില്‍ ഒരു വലിയ കെട്ടിടത്തിന്റെ മുകളില്‍ നിന്ന് ചാടി ആത്മഹത്യ ചെയ്യുന്നു. രേവതി കടുത്ത വിഷാദരോഗത്തിനു അടിമപ്പെട്ടിരുന്നു. ഭര്‍ത്താവ് മരിച്ച് ഒരു കൊല്ലത്തോളം ആവുന്നുണ്ടായിരുന്നിട്ടും രേവതി ആ ദുഃഖം താങ്ങുവാന്‍ കഴിയാതിരുന്ന ഏതോ അവസരത്തില്‍ ആത്മഹത്യ ചെയ്യുന്നു.

രേവതിയ്ക്ക് ഉണ്ടായിരുന്നത് സാധാരണ ദുഃഖമല്ല. കടുത്ത വിഷാദരോഗമാണ്. വിഷാദരോഗം സാധാരണ കാണപ്പെടുന്ന തരം സങ്കടമല്ല. അടുത്തുള്ള ഒരാള്‍ മരണപ്പെടുമ്പോഴോ, എന്തെങ്കിലും നഷ്ടം സംഭവിക്കുമ്പോഴോ അല്ലെങ്കില്‍ പ്രണയനൈരാശ്യം കൊണ്ടോ എല്ലാവര്‍ക്കും ഉണ്ടാവുന്ന സങ്കടം വിഷാദരോഗമല്ല.

വിഷാദരോഗത്തിന്റെ പ്രധാന ലക്ഷണങ്ങള്‍ താഴെ കൊടുക്കുന്നു.

1. കടുത്ത നൈരാശ്യം. എന്ത് സന്തോഷമുണ്ടായാലും അതില്‍ സന്തോഷിക്കുവാനോ അല്ലെങ്കില്‍ പങ്കു ചേരാനോ സാധിക്കാതിരിക്കുക.
2. ചെറിയ കാര്യങ്ങള്‍ക്ക് പോലും പെട്ടെന്ന് പൊട്ടിക്കരയുക, ദേഷ്യപ്പെടുക. കറിയില്‍ ഉപ്പ് കൂടിയെന്ന് പറഞ്ഞ് പോലും കരഞ്ഞിട്ടുള്ളവരുണ്ട്.
3. പെട്ടെന്ന് ഹൈപ്പര്‍ ആക്റ്റീവ് ആവുക.
4. ഉറക്കമില്ലായ്മ.
5. ഭക്ഷണത്തോട് അമിത താത്പര്യമോ അല്ലെങ്കില്‍ പൂര്‍ണ്ണ വിരക്തിയോ. ഇതുമൂലം വണ്ണം കൂടുകയും കുറയുകയും ചെയ്യുക.
6. ലൈംഗിക കാര്യങ്ങളില്‍ താത്പര്യക്കുറവ്.
7. ശരീരത്തില്‍ അങ്ങിങ്ങായി വേദന, ശ്വാസം മുട്ടല്‍ തുടങ്ങിയവ.
8. അടിക്കടിയുള്ള ആത്മഹത്യ ചിന്തകള്‍. അതിനെക്കുറിച്ച് പലവുരു സംസാരിക്കുക. അങ്ങിനെയുള്ള കാര്യങ്ങള്‍ കാ‍ണുവാനും കേള്‍ക്കുവാനും താത്പര്യം കാണിക്കുക.
9. സുഹൃദ്‌വലയങ്ങളില്‍ നിന്ന് അകന്ന് മാറി നില്‍ക്കുക. ഉറ്റ സുഹൃത്തുക്കളില്‍ നിന്നു പോലും അകലുക, ഫോണ്‍ എടുക്കാതിരിക്കുക, കോണ്ടാക്റ്റ്സ് മുഴുവന്‍ വിച്ഛേദിക്കുക.

ഇവയെല്ലാം ചില ലക്ഷണങ്ങള്‍ മാത്രമാണ്. മാനസികമായ അവസ്ഥ ആയതിനാല്‍ പലരും പലതരത്തിലാണ് ഇത് പ്രകടിപ്പിക്കുക. എങ്കിലും ഇതില്‍ പലതും ഉണ്ടെന്ന് തോന്നുകില്‍ സ്വയം വിഷാദരോഗിയാണെന്ന് തിരിച്ചറിയുന്നത് ചികിത്സ തേടുവാന്‍ ഉപകരിക്കും.

പല കാരണങ്ങള്‍ കൊണ്ട് വിഷാദ രോഗത്തിനു അടിമപ്പെടാം. പല തരം വിഷാദ രോഗങ്ങളുണ്ട്. അവയില്‍ പ്രധാനമായ ചിലത്. പ്രായഭേദമന്യേ ഇവയില്‍ പലതും ഉണ്ടാവാറുണ്ട്.

1. മരുന്നുകള്‍ കഴിക്കുന്നതുകൊണ്ടുണ്ടാവുന്ന വിഷാദം. ചില കടുത്ത മരുന്നുകള്‍ കഴിക്കുമ്പോള്‍ അതിന്റെ സൈഡ് ഇഫക്റ്റായിട്ട് വിഷാദരോഗം പിടിപെടും. മദ്യം, പുകവലി അങ്ങിനെ അവ കഴിക്കുന്നത് കൊണ്ടോ അല്ലെങ്കില്‍ അവ പെട്ടെന്ന് നിറുത്തുന്നതുകൊണ്ടോ ഉണ്ടാവുന്നത്.

2. പ്രസവശേഷം സ്ത്രീകള്‍ക്ക് എത്ര കാത്തിരുന്ന കുഞ്ഞാണെങ്കില്‍ പോലും കുഞ്ഞിനെ എടുക്കുവാനോ ലാളിക്കുവാനോ തോന്നാറില്ലാത്തത് ഒരു തരം വിഷാദരോഗമായി തരം തിരിച്ചിരിക്കുന്നു. പോസ്റ്റ്‌‌ പാര്‍ട്ടം ഡിപ്രഷന്‍ എന്ന് നാമധേയം. ഇത് ചിലപ്പോള്‍ തനിയേ മാറുമെങ്കിലും, മറ്റു ചിലപ്പോള്‍ മരുന്നുകള്‍ കഴിക്കാതെ ഇതിനു ശമനം ഉണ്ടാവുകയില്ല. അമ്മമാര്‍ക്ക് ഉണ്ടാവുന്നത് വളരെയധികം തെറ്റിദ്ധരിക്കപ്പെട്ടതാണ്. പ്രസിദ്ധയായ ബ്രൂക്ക് ഷീല്‍ഡ്സിന്റെ വിഷാദരോഗ വിവാദം അറിവുള്ളതാണല്ലോ.

3. ജനതികമായുള്ള വിഷാദരോഗം. ഇത് പലതായി തരം തിരിച്ചിട്ടുണ്ട്. ബന്ധുക്കളില്‍ ആര്‍ക്കെങ്കിലുമോ വിഷാദരോഗമുണ്ടെങ്കില്‍ രോഗത്തിന്റെ ലക്ഷണങ്ങള്‍ കണ്ട് തുടങ്ങുന്ന ഉടനേ വിദഗ്ദ സഹായം തേടേണ്ടത് അത്യാവശ്യമാണ്.

4. ജീവിത രീതിയില്‍ വരുന്ന അവസ്ഥകള്‍ കൊണ്ടുണ്ടാവുന്ന വിഷാദം. എന്തെങ്കിലും പുതിയ ജോലിയോ, കല്ല്യാണമോ, ഭയമോ, മരണമോ അങ്ങിനെ അപ്രതീക്ഷിതമായി ജീവിത രീതിയില്‍ ഉണ്ടാകുന്ന വ്യതിയാനങ്ങള്‍ സൃഷ്ടിക്കുന്നവ.

ചിലപ്പോള്‍ ചെറുതോ അല്ലെങ്കില്‍ കാര്യമായോ ചികിത്സ വേണ്ടുന്ന രോഗമാണ് വിഷാദരോഗം. രോഗി സ്വയം തനിക്ക് വിഷാദരോഗമാണെന്ന് തിരിച്ചറിയുന്നില്ലാത്ത ഒരവസ്ഥയില്‍ ബന്ധുക്കളോ സുഹൃത്തുക്കളോ ശ്രദ്ധിച്ചാലോ മറ്റോ നിങ്ങള്‍ക്ക് ചെയ്യാവുന്ന എളുപ്പമുള്ള കാര്യം പതിയേ അവരുടെ വിശ്വാസം ആര്‍ജ്ജിക്കുകയെന്നതാണ്. അവരെ ചോദ്യങ്ങള്‍ ചോദിച്ച് ബുദ്ധിമുട്ടിക്കുകയോ, സ്നേഹം, സിമ്പതി ഇത് കൊണ്ട് മൂടുകയോ ചെയ്തിട്ടും കാര്യമില്ല. ഇതില്‍ നിന്നെല്ലാം ഓടിയൊളിക്കുവാന്‍ ശ്രമിക്കുന്നവരാണവര്‍. ചിലപ്പോള്‍ ഒരുപാട് സ്നേഹം കൊടുത്താല്‍ പോലും ചിലര്‍ക്ക് താങ്ങുവാന്‍ സാധിക്കില്ല. അത്രയും നേരിയ ബാലന്‍സിലാവും മിക്കവരും ചിലപ്പോള്‍. പെട്ടെന്ന് മാറുന്ന പലതരം മാനസികാവസ്ഥയിലൂടെ കടന്ന് പോവുന്നവരാണവര്‍. അതുകൊണ്ട് തന്നെ വളരെയധികം ത്യാഗവും സ്നേഹവും ക്ഷമയും സമയവും ഇതിനുവേണ്ടി മാറ്റി വെക്കേണ്ടതായി വരുമെന്ന് അറിയുക. ഒരിക്കല്‍ സ്നേഹവും വിശ്വാസവും നേടിയ ശേഷം പകുതി വഴി ഉപേക്ഷിച്ച് പോകുവാനും സാധിക്കില്ല്ല. അത് കൂടുതല്‍ കടുത്ത പ്രശ്നങ്ങളിലേക്കോ ആത്മഹത്യയിലേക്കോ വരെ നയിച്ചെന്നിരിക്കും.

ചെറിയ തരം വിഷാദരോഗമാണെങ്കില്‍ മരുന്നുകള്‍ക്ക് അതീതമായി ചെയ്യാവുന്നത് പുതിയ സ്ഥലത്തേക്ക് മാറുക, പുതിയ ഒരു ഹോബി തിരഞ്ഞെടുക്കുക, പുതിയ കൂട്ടുകെട്ടുകള്‍ ഉണ്ടാക്കാന്‍ ശ്രമിക്കുക, മറ്റെന്തെങ്കിലും കാര്യത്തില്‍ ശ്രദ്ധ കേന്ദ്രീകരിക്കുക തുടങ്ങിയവയാണ്. ആദ്യം തന്നെ ഇത് സ്വയം തിരിച്ചറിഞ്ഞ് അതിനെ അതിജീവിക്കാന്‍ ശ്രമിക്കുന്നതാണ് ഏറ്റവും എളുപ്പവും ഫലവത്തായതുമായ മാര്‍ഗ്ഗം. സ്വയം അതിജീവിക്കാന്‍ സാധിക്കുന്നില്ലെങ്കില്‍ നല്ല ഒരു സുഹൃത്തിന്റെ സഹായം തേടുക അതോടൊപ്പം തന്നെ വൈദ്യസഹായം തേടുക. എല്ലാ രോഗങ്ങളേയും പോലെ പ്രാരംഭദശയാണ് ചികിത്സിച്ച് ഭേദമാക്കാന്‍ എളുപ്പം.

സമര്‍പ്പണം: വിഷാദരോഗത്തിനു അടിമപ്പെട്ടിരുന്ന എന്റെ സുഹൃത്തുക്കള്‍ക്ക്.

ചേര്‍ത്ത് വായിക്കേണ്ടവ : 1. Happiness Already
2. Stages of Grief

Disclaimer: Content of this post is not intended as a professional medical advice. This post is only for informational purposes. Always seek the advice of your physician.