ഉറക്കം

കുട്ടികളെ ഉറക്കുന്നത് ഒരു ഭഗീരഥപ്രയത്നമാണ്. പകല്‍ മുഴുവന്‍ എത്ര കളിച്ച് ക്ഷീണിച്ചാലും ചില നേരത്ത് ഉറങ്ങാന്‍ എന്തൊരു വാശിയാണ്? എന്താവും കാരണം എന്ന് ഞാന്‍ പല തവണ ആലോചിച്ചിട്ടുണ്ട്. കുട്ടികളെ ഉറക്കുന്ന ആളാവും ആദ്യം ഉറങ്ങുക. പാട്ട് പാടുക, കഥ വായിക്കുക, കൊഞ്ചിക്കുക, പാലു കൊടുക്കുക അങ്ങിനെ സകല പരിപാടികളും നടത്തിയാലും കുട്ടികള്‍ ഉറങ്ങില്ല. ഉറങ്ങി എന്ന് കരുതി ഒരു മിനുട്ട് സംശയിച്ചാല്‍ അപ്പോള്‍ മിഴിച്ച് നോക്കും. ഏറ്റവും നല്ലത് ഡ്രൈവിങ്ങാണ്. മിക്ക കുട്ടികളും ഡ്രൈവ് ചെയ്യുന്ന സമയത്ത് ഉറങ്ങാറുണ്ട്. അറ്റ കൈക്ക് അതും പ്രയോഗിച്ചിട്ടുണ്ട്. രാത്രി വണ്ടിയുമെടുത്ത് കുഞ്ഞിനെ ഉറക്കാന്‍ പോയിട്ടുണ്ട്. എന്നാലും ചിലപ്പോള്‍ തിരിച്ച് വന്ന് വണ്ടിയില്‍ നിന്ന് വാരിയെടുക്കുന്ന പാടേ ദേ പിന്നേം മിഴിച്ച് നോക്കും റ്റാറ്റ പോകുന്ന പരിപാടി ഇത്ര വേഗം കഴിഞ്ഞോ എന്ന മട്ടില്‍.

കണ്ണടച്ച് ഉറങ്ങിപ്പോയാല്‍ പിന്നീട് മിഴിതുറക്കുമ്പോള്‍ അമ്മ അടുത്തുണ്ടാവില്ലായെന്ന് കരുതുന്നതുകൊണ്ടാവുമോ ഉറക്കത്തിനു ഇത്ര ശാഠ്യം? ചോദിക്കാമെന്ന് വെച്ചാല്‍ പറയാന്‍ കുഞ്ഞുങ്ങള്‍ക്ക് അറിയില്ലല്ലോ?