ഫാസിസം അഥവാ ഫാഷിസം

ഇന്നത്തെ പത്രങ്ങളിൽ ആശാവഹമായൊരു സുപ്രധാന വാർത്ത ഉണ്ടായിരുന്നു. അതിനു എത്രമാത്രം പ്രാധാന്യം കൊടുക്കുന്നുവെന്നു അറിയില്ല. പക്ഷെ എന്റെ കാര്യത്തിൽ എനിക്കേറ്റവും സന്തോഷം തോന്നിയ ഒരു വാർത്തയായിരുന്നു തപസി മാലികിന്റെ ഘാതകരെ കോടതി ശിക്ഷിച്ചു എന്നത്. അതും രണ്ട് വർഷത്തിനുള്ളിൽ നിർധനായ ഒരു കുടുംബത്തിനു ഇതുപോലെയൊരു വിധി ഇന്ത്യൻ നീതിപീഠത്തിൽ നിന്നു ലഭിക്കുക എന്നത് ഇന്ത്യയിലുള്ള എന്റെ വിശ്വാസം വളരെയധികം കൂട്ടുകയാണ് ചെയ്തത്.

ആരാണ് തപസി മാലിക്? പതിനെട്ട് വയസ്സുള്ള ദളിത് യുവതി.

എങ്ങിനെയാണ് മരിച്ചത് ? ബലാത്സംഗം ചെയ്യപ്പെടുകയും ചുട്ടുകരിക്കപ്പെടുകയും ചെയ്തു.

അവളുടെ കുറ്റം? സംസ്ഥാന ഗവണ്മെന്റ് സ്വന്തം കൃഷി ഭൂമി ഏറ്റെടുത്ത് റ്റാറ്റക്ക് നൽകുന്നതിനെതിരെ സിംഗൂരിൽ സമരത്തിൽ മുൻനിരയിൽ നിന്നു. അവൾ ധൈര്യവതിയായ ഒരു പെൺകുട്ടിയായിരുന്നുവെന്നും സമരത്തിനു വളരെയധികം ഊർജ്ജം പകർന്നിരുന്നുവെന്നും സമരക്കാർ.

ആരാണ് ഘാതകർ? ദേബു മാലിക്, സുഹൃദ് ദത്ത (രണ്ട് പേരും സി.പിഎം കാർ) . ഇവർ സിംഗൂരിലെ സമരം നയിക്കുന്നവർക്കെതിരെ ഉള്ള 'സമരക്കാർ'. അതായത് പശ്ചിമ ബംഗാൾ ഗവണ്മെന്റ് ഒത്താശയോടെ സമരത്തിനെ എതിർക്കുന്നുവർ.

കമ്മ്യൂണിസ്റ്റ് പാർട്ടിയുടെ മൗത് പീസായ പീപ്പിൾസ് ഡെമോക്രസി എന്ന പാർട്ടി പത്രം പറഞ്ഞത് അവളുടെ അച്ഛനും സഹോദരനും കൂടി അവളെ കൊന്നു എന്നാണ്. അവൾക്ക് കാമുകന്മാരുണ്ടായിരുന്നുവെന്നും കഥകൾ പരത്തി. എങ്കിലും അറുപത്തിനാലു സാക്ഷികളെ വിസ്തരിച്ച് കോടതി ഇന്നലെ കണ്ണു തുറന്നു.

കാലം പോയ പോക്കു നോക്കണം. ചോരച്ചാലുകൾ നീന്തിക്കയറിയവർ ചോരക്കളം സൃഷ്ടിക്കുന്ന പുതിയ കീഴ്വഴക്കങ്ങൾ. രക്ഷകർ വേട്ടക്കാരാവുന്നതിലെ വിധിവൈപരീത്യം. മായാവതി 'ദളിത്' പ്രധാനമന്ത്രിയെന്ന് കൊട്ടിഘോഷിച്ചവർ. വടക്കേ ഇന്ത്യയിലെ ദളിത് കൂട്ടങ്ങളെ സവർണ്ണർ കുരുതിക്കൊടുക്കുമ്പോൾ (മുതല)ക്കണ്ണീർ ഒഴുക്കുന്നുവർ. വേശ്യയുടെ ചാരിത്ര്യ പ്രസംഗം എന്ന് ഞാൻ പറയില്ല (വേശ്യകൾക്കുമുണ്ട് ചാരിത്ര്യവും അവകാശങ്ങളും.) ഹിറ്റ്ലർമാരുടെ അഹിംസാവാദം!

ആരാണ് ശരിയായ കുറ്റക്കാർ? സി.പി.എംകാരാണോ? പൂർണ്ണമായും അല്ല. "'When a giant tree falls, the earth below shakes" എന്നു പതിനായിരം സിക്കുകാരെ ചുട്ടും എരിച്ചും കുരുതികൊടുത്തതിനെ പറ്റി രാജീവ് ഗാന്ധി എന്ന 'പോപ്പുലർ' പ്രധാനമന്ത്രി, ഇന്ത്യയുടെ അന്നത്തെ നവ പ്രതീക്ഷ, ഇന്ത്യയുടെ അന്നത്തെ യുവത്വം പ്രതികരിച്ചത് അങ്ങിനെയാണ്. അത്രയും ലാഘവത്വത്തോടെ. പതിനായിരം പേർ. ജെനോസൈഡ്. മറ്റൊരു ജനാധിപത്യ രാജ്യത്തും അങ്ങിനെയുള്ള വാക്കുകൾ ഉച്ചരിച്ച ഒരാൾ പ്രധാനമന്ത്രിയോ ഏതെങ്കിലും സ്ഥാനമോ വഹിക്കുമോ എന്ന് സംശയമാണ്.

അമേരിക്കയിൽ ഒരുപാട് മാഫിയാ ഗാംഗുകൾ ഉണ്ട്. ഗോഡ് ഫാദർ എന്ന സിനിമയിൽ കാണുന്ന റൊമാന്റിക്ക് ഗാംഗുകൾ അല്ല. ശരിക്കും മാഫിയ. ദ റിയൽ വൺസ്. അതിൽ ഏറ്റവും പാവങ്ങളാണ് ഇറ്റലിക്കാർ. അവയിൽ ഏറ്റവും ക്രൂരർ റഷ്യൻ മാഫിയയും. പക്ഷെ ഇവിടെയൊന്നും ഒരൊറ്റ ഇന്ത്യൻ ഗാംഗുകൾ ഇല്ല. ചൈനീസ് കൊറിയൻ ഗാംഗ് വാറുകൾ വരെയുണ്ട്. പക്ഷെ ഇന്ത്യൻ ഗാംഗുകൾ ഇല്ല. അന്വേഷിച്ച് അറിഞ്ഞതനുസരിച്ച് യൂറോപ്പിലുമില്ല. എന്തിനു ഏറ്റവും കൂടുതൽ ഇന്ത്യക്കാരുള്ള ഗൾഫിൽ പോലുമില്ല(?). മറ്റു രാജ്യങ്ങളിൽ നമ്മൾ വളരെ മര്യാദയുള്ളവരാണ്. അതായത് ശക്തമായ ഒരു നിയമവ്യവസ്ഥിതിയിൽ നമ്മൾ നല്ലപിള്ളമാരാണ്. നമ്മുടെ അഭിപ്രായങ്ങൾക്ക് വിലങ്ങ് തടിയായി നിൽക്കുന്നവരെ ചുട്ടെരിക്കാറില്ല, കൊന്നു തള്ളാറില്ല.

പിന്നെ എന്തുകൊണ്ട് ഇന്ത്യയിൽ ഈ റയറ്റിങ്ങ് മെന്റാലിറ്റി (rioting mentality)? കാരണമുണ്ട്. വോട്ട് ബാങ്ക്! അതിനു ന്യായവുമുണ്ട്. ഇങ്ങ് കേരളത്തിൽ കണ്ണൂരിൽ ന്യൂനപക്ഷങ്ങളെ സംരക്ഷിക്കാനത്രെ അവിടെ അധികാരത്തിൽ ഇരിക്കുന്നുവരുടെ ഒത്താശയോടെ ഗുണ്ടായിസം. സംരക്ഷിച്ച് സംരക്ഷിച്ച് കണ്ണൂരിൽ ഇപ്പോൾ തീവ്രവാദികളുടെ വിളയാട്ടം. ഒരു ബോംബ് നിർമ്മിച്ചാലോ പൊട്ടിയാലോ കണ്ണൂരിൽ അതൊരു സംഭവമല്ല. അത്രയും നല്ലൊരു തീവ്രവാദ സംസ്കാരം വ്യത്യസ്ത പാർട്ടിക്കാർ ഉണ്ടാക്കിയെടുത്തു. കൂടുതൽ കൂടുതൽ അക്രമങ്ങൾക്കുള്ള കാലാവസ്ഥ നിർമ്മിച്ചു കൊടുത്തു. എന്നിട്ടിപ്പോൾ ഞെട്ടൽ രേഖപ്പെടുത്തുന്നു. അന്യോന്യം പഴി ചാരുന്നു.

'ഭൂരിപക്ഷ തീവ്രവാദത്തിനോടൊപ്പം അപകടകരമാണ് ന്യൂനപക്ഷ തീവ്രവാദം' പറഞ്ഞത് മറ്റാരുമല്ല, പിണറായി വിജയൻ. അതായത് ഈയടുത്ത കാലത്ത് ഇത് അദ്ദേഹത്തിനെക്കൊണ്ട് പറയിപ്പിച്ചത് വോട്ട് ബാങ്ക്. ഇന്ത്യയിൽ ബാക്കിയെവിടെ ഇസ്ലാമിക തീവ്രവാദം നടമാടിയാലും അതെല്ലാം ഭൂരിപക്ഷത്തിന്റെ തലയിൽ കെട്ടിവെക്കുന്ന സർക്കസ്സുകൾ കേരളത്തിലെ തീവ്രവാദ ലിസ്റ്റുകൾ പുറത്ത് വന്നപ്പോൾ എന്തുകൊണ്ടോ കാണിച്ചില്ല. അത്രയും നല്ലത്.

ഇന്ത്യയുടെ വടക്ക്കിഴക്കൻ സംസ്ഥാനങ്ങളിൽ അസ്സലായ ക്രിസ്ത്യൻ തീവ്രവാദത്തിന്റെ വാർത്തകൾ. ഒരു വൃദ്ധ സ്വാമിയെ കൊല്ലുവാൻ മാവോയിസ്റ്റുകൾക്ക് പണം കൊടുത്തുവെന്ന വാർത്തകൾ, ആരോപണങ്ങൾ. അതിനും മുൻപും മിഷണറിമാർ തോക്ക് ചൂണ്ടിയ കഥകൾ. അത് കലാശിച്ചത് ക്രിസ്ത്യാനികളെ ചുട്ടുകൊന്ന്. പോലീസുകാരൻ നോക്കിനിൽക്കേ കന്യാസ്ത്രീയെ നശിപ്പിച്ചുവെന്ന്. നിയമവും ജനങ്ങളും മോരും മുതിരയും പോലെ.

എല്ലാവർക്കും ന്യായങ്ങളുണ്ട്. മറ്റൊരുവൻ പ്രകോപിപ്പിച്ചു. അതായത് മറ്റൊരു ജാതി, മറ്റൊരു മതം മറ്റൊരു പാർട്ടിയുടെ പ്രകോപനം കാരണം നിസ്സഹായരെ ചുട്ടുകൊല്ലാം എന്ന വിചിത്രമായ ന്യായവ്യവസ്ഥ. ഇന്ത്യയിൽ കലാപങ്ങൾ മിക്കതും വിവിധ സർക്കാരുകൾ അറിഞ്ഞുകൊണ്ടും വളർത്തിയും കണ്ണടച്ചും ഉണ്ടാക്കുന്നതാണ്. കാരണം വോട്ട് ബാങ്ക്! അന്യോന്യം കൊല്ലുന്നതിനു നമ്മൾ സർക്കാരുകളെ ജയിപ്പിച്ച് വിടുന്നു.

മഹാരാഷ്ട്രയിൽ രാജ് താക്കറ്യുടെ വിഡ്ഡിത്ത പുലമ്പലുകൾ. അത് കലാശിച്ചത് ബിഹാറിയായ ഒരുവന്റെ കൊലപാതകത്തിൽ.

പ്രഗ്യാ സിംഗ് എന്ന സന്യാസിനിയുടെ, ഇന്ത്യൻ ആർമിയിൽ പോലും ചൂഴ്ന്നു നിൽക്കുന്ന തീവ്രവാദ ശക്തികൾ. ഗുജറാത്തിൽ മുസ്ലീം സുഹൃത്ത് പറയുന്നു ഇപ്പോൾ അവിടെ യാതൊരു വിധ കുഴപ്പവുമില്ലായത്രേ. മോഡി ഭരിക്കുമ്പോൾ ലഹളകൾ ഇല്ലായെന്ന്. എത്ര നല്ല മറവി. രണ്ട് മതങ്ങളെ മതിലുകൾ പണിത് വിഭജിച്ച് നിർത്തുവാൻ സാധിക്കുന്ന രാഷ്ട്രീയക്കാരനു ശോഭനമായ ഭാവി.

ആരാണ് കുറ്റക്കാർ? എങ്ങിനെയാണ് കേരളം പോലൊരു സംസ്ഥാനത്ത് പോലും മൂന്നോറോളം പേരെ കാഷ്മീരിലേക്ക് ട്രെയിനിങ്ങിനായി പറഞ്ഞു വിടാൻ സാധിക്കുന്നത്? ഇവരെല്ലാം തീവ്രവാദികളാവും എന്ന് ഞാൻ വിശ്വസിക്കുന്നില്ല. ഗഫൂർക്കമാർ പെറ്റി ക്രിമിനലുകളെ ഗൾഫ് കാണിക്കാൻ കൊണ്ടു പോയതാവുമെന്നേ എനിക്ക് തോന്നുന്നുള്ളൂ. മകന്റെ മുഖം കാണണ്ടയെന്നു പറഞ്ഞ് വിലപിക്കുന്ന മാതാവ് ദേശസ്നേഹം മൂത്തിട്ടാണത് ചെയ്തെന്നും ഞാൻ കരുതുന്നില്ല. ഭയമാണ്. തെറ്റായ ഒരു വാക്ക് പറഞ്ഞാൽ, തെറ്റായ ഒരു പാർട്ടിയിൽ അകപ്പെട്ടാൽ, തെറ്റായ ഒരു മതത്തിൽ വിശ്വസിച്ചാൽ മരണം ഉറപ്പ്. ചുട്ടു കൊല്ലും! തെറ്റ് എന്ന് പറയുന്നത് ഇന്ത്യൻ നിയമവ്യവസ്ഥിതി നിഷ്കർഷിക്കുന്ന തെറ്റല്ല. ആൾക്കൂട്ടങ്ങൾ പാർട്ടികളുടെ, വോട്ട് ബാങ്കിന്റെ ബലത്തോടെ, അധികാരത്തോടെ അടിച്ചേല്‍പ്പിക്കുന്ന തെറ്റുകൾ.

മലയാളികൾ ഏറ്റവും കൂടുതൽ ഉപയോഗിക്കുന്ന വാക്കാണ് ഫാസിസം. ഫാഷിസം എന്ന ഇറ്റാലിയൻ വാക്കിന്റെ ആംഗ്ലിസൈസ്ഡ് വേർഷൻ. നമുക്ക് എല്ലാത്തിനും ഫാസിസമാണ്. അപ്പറത്തെ കുട്ടപ്പന്റെ കടയുടെ അടുത്ത് ഇപ്പറത്ത് ആരെങ്കിലും കട തുടങ്ങിയാൽ അതും ഫാസിസ്റ്റുകളാവും. അത്രയും ഗൗരവത്തോടേയും അത്രയും തന്നെ ലാഘവത്തോടേയും നമ്മൾ പുലരുവോളം ഫാസിസത്തെപറ്റി പ്രസംഗിക്കും. പക്ഷെ കുരുതികൊടുക്കുന്നവരുടെ ചിത്രങ്ങളിൽ നമ്മൾ പാർട്ടിയെണ്ണും. പാർട്ടി വെച്ച് ശരിയും തെറ്റും അളക്കും. മതം വെച്ച് ചോരയുടെ നിറം ചുവപ്പിക്കും. നിയമങ്ങളെപറ്റി ബോധവാന്മാരെങ്കിലും അവയെ കാറ്റിൽപ്പറത്തി ആൾക്കൂട്ട നീതി നടപ്പാക്കും. ജയിലുകളിൽ നിന്ന് അതാത് ഗവണ്മെന്റുകൾ മാറുമ്പോൾ കൊലപാതകികളെ രക്ഷപ്പെടുത്തും. പാർട്ടി മാറിയവനെ വെട്ടും. അതിലുപരി ഇതെല്ലാം സർവ്വസാധാരണമെന്ന മട്ടിൽ കണ്ണടക്കും. അവനവനിലേക്ക് ചൂണ്ടുന്ന മൂന്നു വിരൽ വെട്ടിക്കളയുകയും മറ്റവനെ ചൂണ്ടി ഫാഷിസ്റ്റ് എന്ന് മുദ്രണം ചെയ്യുകയും ചെയ്യും.

വർഗ്ഗീയത കൂടുന്നു തീവ്രവാദം കൂടുന്നു എന്നു വിലപിച്ചതുകൊണ്ടായില്ല. നിയമങ്ങൾ നിയമമായി തന്നെ എടുക്കുവാനും പാർട്ടി തിരിവില്ലാതെ അതു നടപ്പിലാക്കാനും ഒരു സർക്കാരിനു കഴിയണം. ജനാധിപത്യം എന്നാൽ ഭൂരിപക്ഷത്തിന്റെ നിയമമല്ല. വർഷങ്ങളായി ചൂണ്ടു വിരലിൽ മഷി പുരളുന്നതുമല്ല. താഴേക്കടിയിലുള്ള ഒരുവനും യാതൊരു ഭയവുമില്ലാതെ നിയമവ്യവസ്ഥയിൽ നിന്നു കൊണ്ട് അവനവന്റെ ജീവിതം മുന്നോട്ട് കൊണ്ടു പോകുവാൻ കഴിയുന്ന അന്നേ ജനാധിപത്യമെന്നു അതിനെ വിശേഷിപ്പിക്കാനാവൂ.

പക്ഷെ അധികം പ്രതീക്ഷയില്ല. ഏറ്റവും കൂടുതൽ സാക്ഷരരെന്നു നടിക്കുന്ന ഒരു സംസ്ഥാനത്തിന്റെ അവസ്ഥ ഇതെങ്കിൽ ഇന്ത്യയിൽ എങ്ങിനെ നിയമം വാഴുമെന്ന് പ്രതീക്ഷിക്കാൻ സാധിക്കും? അനേകം തപസി മാലിക്കുമാർ എങ്ങിനെ ഇനിയും
ചുട്ടുകരിക്കപ്പെടാതെയിരിക്കും?

ചിലപ്പോൾ ദേബു മാലികുമാരും സുഹൃദ് ദത്തയും രക്ഷപ്പെടും. അല്ലെങ്കിൽ ജയിലിൽ അല്പകാലത്തേക്ക് മാത്രം സുഖചികിത്സ നേടും, പാർട്ടി സീറ്റിൽ മത്സരിക്കും, മന്ത്രിമാർ വരെയാവും. തപസി ആത്മഹത്യ ചെയ്യുകയും അവളുടെ അച്ഛൻ അവളെ ബലാത്സംഗം ചെയ്യുകയും ചെയ്യും, ഇല്ലെങ്കിൽ ചെയ്യിപ്പിക്കും നമ്മൾ! അതാണ് നമ്മുടെ ജനാധിപത്യം.

Image courtesy: BBC