പുതുപ്പണക്കാരി

ബ്ലോഗിങ്ങ് ഗൂഗിളിന്റെ സെര്‍വറുകളില്‍ നിന്നെല്ലാം മാറി സ്വതന്ത്രമായി നിലകൊള്ളുമ്പോള്‍ മിനുട്ടിനു മിനുട്ടിനു ചവറെഴുതുവാന്‍ എന്നെപ്പോലുള്ളവര്‍ തുനിയില്ല. കാരണം, വാടകക്കെടുക്കുന്ന സെര്‍വര്‍ സ്പേസിനു കാശുമുടക്കുണ്ട്. അങ്ങിനെ ഒരു അവസ്ഥയിലേക്ക് ബ്ലോഗിങ്ങ് സീരിയസായി മുന്നേറുമ്പോള്‍ എടുക്കുന്ന സെര്‍വര്‍‌സ്പേസിന്റെ റണ്ണിങ്ങ് കോസ്റ്റ് പരസ്യങ്ങളിലൂടെ നികത്താന്‍ സാധിച്ചാല്‍ അതില്പരം നല്ലൊരു കാര്യം എന്തുണ്ട്?

അങ്ങിനെ ഒരു പരീക്ഷണാടിസ്ഥാനത്തില്‍ ഒന്‍പത് മാസങ്ങള്‍ക്ക് മുന്‍പ് ഗൂഗിള്‍ ആഡ്സ് വെക്കുകയും നൂറ്റിചില്വാനം ഡോളര്‍ പിരിഞ്ഞുകിട്ടുകയും ചെയ്തു. ഇംഗ്ലീഷില്‍ പാചക ബ്ലോഗിങ്ങ് തുടങ്ങിയത് മലയാളിയുടെ തനതു രുചികളെ മലയളികളല്ലാത്ത ഒരു സമൂഹത്തിനു സരസമായി പരിചയപ്പെടുത്തുക എന്ന ഗൂഢോദ്ദേശ്യമായിരുന്നു. ആന്ധ്രാക്കാരും തമിഴരും ഗുജറാത്തികളും ഒക്കെ നമ്മുടെ കുത്തരി പരീക്ഷിച്ച് ഇത്രയും നല്ലൊരു അരി ഞങ്ങള്‍ കാണാതെ പോയതെന്തേ എന്ന് ചോദിക്കുമ്പോള്‍ കേരളത്തിന്റെ അരി ഉല്പാദനം കൂടുന്നതും കുത്തരിക്കഞ്ഞി സായിപ്പ് വരെ മുളകുപൊട്ടിച്ച് കഴിക്കുന്നതും അങ്ങിനെ വെച്ചടിവെച്ചടി മലര്‍പ്പൊടിക്കാരന്‍ നടന്ന് നീങ്ങുന്നതും ഞാന്‍ സ്വപ്നം കണ്ടു. ആ സ്വപ്നം കാണലില്‍ നിന്നുമാണ് പാചക ബ്ലോഗ് എഴുതാനുള്ള പ്രചോദനം എപ്പോഴും കിട്ടുന്നത്.

പാചക ബ്ലോഗ് എന്നാല്‍ എന്തോ സ്ത്രീകളുടെ അടുക്കള കാര്യം പോലെ കാണുന്നവരുണ്ട്. എന്നാല്‍ ഇന്ത്യന്‍ പാചക ബ്ലോഗില്‍ ഏറ്റവും കൂടുതന്‍ ഇന്ത്യയെ ആഘോഷിക്കുന്നത് ഈ പാചക ബ്ലോഗുകളാണ്. ഒരു സാധാരണ കാളന്റെ പാചകവിധിയേക്കാളും അതിനു പിന്നിലുള്ള ചേരുവകള്‍, ചരിത്രം, പഴയ പാചക രീതികള്‍, ഗുണങ്ങള്‍, അതിനു വേണ്ട പച്ചക്കറികള്‍ പ്രകൃതിദത്തമായി നട്ട് വളര്‍ത്തുന്നത് ഇങ്ങിനെ ഇത്രമാത്രം മനസ്സറിഞ്ഞ് സ്നേഹം വിളമ്പി ബ്ലോഗുന്ന മറ്റൊരു തരത്തിലുള്ള ബ്ലോഗിങ്ങ് ഇല്ലാ എന്ന് തന്നെ പറയാം. മാത്രമല്ല പരിസ്ഥിതി പ്രശ്നങ്ങള്‍, അന്യം നിന്ന് പോകുന്ന ആഘോഷങ്ങളെ പറ്റിയുള്ള അറിവുകള്‍, ഭക്ഷണത്തിന്റെ ഇമ്പോര്‍ട്ട് എക്സ്പോര്‍ട്ട് നിയമങ്ങള്‍, സംസ്കാ‍രങ്ങള്‍ ഇവയെക്കുറിച്ച് എല്ലാം സമഗ്രമായ പോസ്റ്റുകളുണ്ട്.
പാചക ബ്ലോഗില്‍ ഇതിനെ കുറിച്ച് വിശദമായ ഒരു പോസ്റ്റുണ്ട്. (അത് തന്നെ ഇവിടെ പകര്‍ത്താന്‍ ഉദ്ദേശിക്കുന്നില്ല. ദയവായി അത് വായിക്കുക)

എന്തായാലും ഇന്ത്യക്കാരുടെ പ്രത്യേകിച്ചു മലയാളികളുടെ പ്രശ്നങ്ങളായ
1) നിറയേ കാശ് വേണം, പക്ഷെ ‍ആരെങ്കിലും കണ്ടാലോ?
2) ഏയ് എനിക്ക് കാശില്‍ കമ്പമില്ല ഞാന്‍ തികച്ചും ഗാന്ധിമാര്‍ഗ്ഗം, പക്ഷെ ലേറ്റസ്റ്റ് ഐപോഡും ക്യാമറഫോണും വേണം -- ഇത്യാദി ഹിപ്പോക്രസിയില്‍ ഒക്കെ ഞാനും ഉള്‍പ്പെടാറുള്ളതുകൊണ്ട് പരസ്യങ്ങള്‍ വെക്കുന്നത് ചിലപ്പോള്‍ ഒരു ചമ്മലാവുകയും ഞാന്‍ എടുത്ത് മാറ്റുകയും ഒന്നുറങ്ങിക്കഴിഞ്ഞ് ബോസിന്റെ മുഖം കാണുമ്പോള്‍, പോടോ ഞാന്‍ ബ്ലോഗെഴുതി കാശുണ്ടാക്കുമെടോ തന്റെ ശമ്പളം ആര്‍ക്ക് വേണം എന്ന് തോന്നുകയും പിന്നേയും അവ എടുത്ത് വെക്കുകയും ഒക്കെ ഇതിന്റെ ഇടയ്ക്ക് പല തവണ ചെയ്തിട്ടുണ്ട്.

അങ്ങിനെ ആളുകള്‍ ക്ലിക്കിയും ക്ലിക്കാതെ പേജ് ലോഡിനും ഒക്കെ കൂടിയായി തരക്കേടില്ലാത്ത പോയിന്റ് ആന്റ് ഷൂ‍ട്ട് ക്യാമറ മേടിക്കാനുള്ള കാശ് പിരിഞ്ഞു കിട്ടിയതായി സസന്തോഷം ഇവിടെ പറഞ്ഞുകൊള്ളുന്നു. എല്ലാ‍ ദിവസവും പാചക ബ്ലോഗ് അപ്ഡേറ്റിയിരുന്നെങ്കില്‍ എന്റെ ഒരു കണക്കനുസരിച്ചു ഇത് എകദേശം അഞ്ചു മാസം കൊണ്ട് ഇത്രയും തുക കിട്ടുമെന്നാണ്. എന്തായാലും ഈ വിവരങ്ങള്‍ മറ്റൊരാള്‍ക്ക് ബ്ലോഗ് തുടങ്ങാനും മറ്റും പ്രചോദനമാ‍വാനുതകും എന്നൊരൊറ്റ കാരണത്താലാണ് മലയാളത്തിലും പോസ്റ്റുന്നത്.

പുതിയ നാമങ്ങള്‍ : ഇഞ്ചി മുതലാളി / ബൂര്‍ഷ്വാ / സാമ്രാജ്യത്വ കുത്തക മൂരാച്ചി / തൊഴിലാളി ചൂഷക
വില്പനയ്ക്ക് : അര്‍ദ്ധരാത്രി തുറക്കുന്ന ജപ്പാ‍ന്‍ മേഡ് കുട.

ഇനി അടുത്തത് എന്റെ ലിസ്റ്റില്‍ ഇതുപോലെ ബ്ലോഗെഴുതി എഴുതി ആളുകള്‍ ക്ലിക്കി ക്ലിക്കി ഒരു ചെറിയ ഫ്റാറി. തീരെ ചെറിയ സ്വപ്നങ്ങളേയുള്ളൂ. ദേ പോണൂ മലര്‍പൊടിക്കാരന്‍. പിന്നാലെ ചെല്ലട്ടെ!